“E” guruhi
Musobaqaning amaldagi chempioni “Liverpul” Neapolga safar qildi. Uchrashuv teng kurashlar ostida kechdi, biroq maydon egalari so‘nggi o‘n daqiqalikning boshi 11 metrlik jarima zarbasi ishlab oldi. Penaltini Dris Mertens aniq amalga oshirgan holda hisobni ochdi. Hakam tomonidan qo‘shib berilgan vaqtda Fernando Lyorente markaziy himoyachilarning qo‘pol xatosidan unumli foydalanib mezbonlarning ikkinchi golini urdi.
Mazkur jamoalari o‘tgan mavsum ham bir guruhdan joy olgandi. O‘shanda Italiyada minimal hisobda yutqazgan “qizillar” javob bahsida g‘alabaga erishgan holda “Napoli”ni keyingi bosqichdan bebahra qoldirgandi.
Guruhning ikkinchi o‘yinida “RB Zalsburg” o‘z uyida “Genk”ni qabul qildi. Unda avstriyaliklar yirik hisobdagi g‘alabani qo‘lga kiritdi. 19 yoshli Erling Holand tanaffusgacha o‘zidayoq het-trik qayd etdi va birinchi bo‘limda uchta gol urgan YChL tarixidagi eng yosh futbolchiga aylandi. Bundan tashqari janubiy koreyalik futbolchi Hvan Hi Chan bitta gol urdi va ikkita samarali uzatmaga mualliflik qildi.“F” guruhi
“O‘lim” guruhi deya ta’riflangan mazkur kvartetda ilk turdayoq bahslar qiziqarli tus oldi. Dastlab “Inter” Milanda “Slaviya” bilan kuch sinashdi va sal qolsa sensatsion mag‘lubiyatga uchrashi mumkin edi. Hakam tomonidan qo‘shib berilgan vaqtda Nikolo Barella milanliklarni mag‘lubiyatdan qutqarib qoldi. Bu o‘yin orqali chex klubi osonlikcha taslim bo‘lmasligini isbotlay oldi. Shuningdek, Antonio Konte hali ko‘p ishlarni amalga oshirishi kerakligi ko‘rindi.
Turning markaziy o‘yinlaridan biri Dortmundda bo‘lib o‘tdi. “Borussiya” klubi guruh favoriti “Barselona” bilan o‘ynadi. Uchrashuvning dastlabki bo‘limi teng kurashlar ostida o‘tdi, tanaffusdan keyin esa tashabbus to‘liq maydon egalari tomoniga o‘tdi. 57-daqiqada nemis klubi oldinga o‘tib olishi mumkin edi, biroq Marko Roysning penaltidan yo‘lagan zarbasini Mark-Andre ter Shtegen qaytarib qoldi. Qolgan vaqtda ham germaniyalik posbonning seyvlari katalonlarni muqarrar gollardan saqlab qoldi. “Barselona” 80-daqiqadan keyin oldinga o‘ta boshladi va bir nechta imkoniyatlarga ega bo‘ldi. Biroq qiziqarli o‘tgan uchrashuv golsiz yakun topdi.“G” guruhi
Bu guruhda yaqqol favorit bo‘lmasada, barcha jamoalar teng kuchli ekani bilan ajralib turibdi. “Leypsig” Lissabonga safar qildi va “Benfika” bilan bahs yuritdi. Timo Vernerning dubliga portugallar Haris Seferovichning aniq zarbasi bilan javob qaytardi. O‘yin mobaynida mezbonlarda bir qator qulay imkoniyatlar yuzaga keldi, biroq “Benfika” futbolchilar ulardan samarali foydalana olmadi.
Guruhning ikkinchi o‘yinida “Lion” “Zenit”ni qabul qildi. Birinchi bo‘lim yakunlanishi arafasida Sardor Azmun piterliklarni oldinga olib chiqdi. Biroq fransuz klubi ikkinchi bo‘lim avvalida hisobni tenglashtirishga muvaffaq bo‘ldi. Memfis Depayning goli uchrashuvdagi oxirgisi bo‘ldi.“H” guruhi
“Chelsi” La Ligada “Barselona”dan qaqshatqich mag‘lubiyatni qabul qilib kayfiyatsiz holda Londonga tashrif buyurgan “Vаlensiya” bilan bahs olib bordi. Uchrashuvning 74-daqiqasida Rodrigo tomonidan kiritilgan yagona to‘p ispanlarga uch ochko taqdim etdi. O‘yin yakunlanishi arafasida Ross Barkli penaltini aniq amalga oshira olmadi. Bundan tashqari londonliklarning yosh futbolchisi Meyson Maunt jarohat oldi. Shu tariqa Frenk Lempard Chempionlar Ligasida mavsumni mag‘lubiyat bilan boshlagan ilk “Chelsi” murabbiyiga aylandi.
Ikkinchi uchrashuvda “Ayaks” o‘zida “Lill” bilan o‘ynadi. Kvinsi Promes, Edson Alvares va Nikolas Talyafikoning gollari amsterdamliklarga g‘alaba keltirdi.
YChL
1-tur bahslari
17-sentabr, seshanba
“E” guruhi
“Zalsburg”—“Genk” 6:2
Gollar: 1:0 — 2 Holand, 2:0 — 34 Holand, 3:0 — 36 Hvan Hi Chan, 3:1 — 40 Lukumi, 4:1 — 45 Holand, 5:1 — 45 Soboslai, 5:2 — 52 Samatta, 6:2 — 66 Ulmer“Napoli”—“Liverpul” 2:0
Gollar: 1:0 — 82, penalti Mertens, 2:0 — 90+2 Lyorente“F” guruhi
“Inter”—“Slaviya Praga” 1:1
Gollar: 0:1 — 63 Olayika, 1:1 — 90 Barella“Borussiya D”—“Barselona” 0:0
“G” guruhi“Lion”—“Zenit” 1:1
Gollar: 0:1 — 41 Azmun, 1:1 — 51, penalti, Depay“Benfika”—“Leypsig” 1:2
Gollar: 0:1 — 69 Verner, 0:2 — 78 Verner, 1:2 — 84 Seferovich“H” guruhi
“Chelsi”—“Valensiya” 0:1
Gol: 0:1 — 74 Rodrigo“Ayaks”—“Lill” 3:0
Gollar: 1:0 — 18 Promes, 2:0 — 50 Alvares, 3:0 — 62 TalyafikoYChLning 17-sentabr kungi o‘yinlari bo‘yicha ramziy terma jamoa
Mark-Andre ter Shtegen, Ashraf Hakimi, Joel Veltman, Mats Hummels, Nikolas Talyafiko, Edson Alvares, Takumi Minamino, Hakim Ziyosh, Memfis Depay, Hvan Hi Chan, Erling Holand.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)