Дортмундда юта олмаган «Барселона», амалдаги чемпионнинг мағлубияти ва омадсиз «Челси». ЕЧЛда тур тафсилотлари

Европа Чемпионлар Лигасида 1-тур учрашувлари бўлиб ўтди. «Дарё» 17 сентябрь, сешанба куни бўлиб ўтган учрашувлар тафсилотлари билан ўртоқлашади.

«Е» гуруҳи

Мусобақанинг амалдаги чемпиони «Ливерпуль» Неаполга сафар қилди. Учрашув тенг курашлар остида кечди, бироқ майдон эгалари сўнгги ўн дақиқаликнинг боши 11 метрлик жарима зарбаси ишлаб олди. Пенальтини Дрис Мертенс аниқ амалга оширган ҳолда ҳисобни очди. Ҳакам томонидан қўшиб берилган вақтда Фернандо Льоренте марказий ҳимоячиларнинг қўпол хатосидан унумли фойдаланиб мезбонларнинг иккинчи голини урди.

Мазкур жамоалари ўтган мавсум ҳам бир гуруҳдан жой олганди. Ўшанда Италияда минимал ҳисобда ютқазган «қизиллар» жавоб баҳсида ғалабага эришган ҳолда «Наполи»ни кейинги босқичдан бебаҳра қолдирганди.

Гуруҳнинг иккинчи ўйинида «РБ Зальцбург» ўз уйида «Генк»ни қабул қилди. Унда австрияликлар йирик ҳисобдаги ғалабани қўлга киритди. 19 ёшли Эрлинг Ҳоланд танаффусгача ўзидаёқ ҳет-трик қайд этди ва биринчи бўлимда учта гол урган ЕЧЛ тарихидаги энг ёш футболчига айланди. Бундан ташқари жанубий кореялик футболчи Ҳван Ҳи Чан битта гол урди ва иккита самарали узатмага муаллифлик қилди.

«F» гуруҳи

«Ўлим» гуруҳи дея таърифланган мазкур квартетда илк турдаёқ баҳслар қизиқарли тус олди. Дастлаб «Интер» Миланда «Славия» билан куч синашди ва сал қолса сенсацион мағлубиятга учраши мумкин эди. Ҳакам томонидан қўшиб берилган вақтда Николо Барелла миланликларни мағлубиятдан қутқариб қолди. Бу ўйин орқали чех клуби осонликча таслим бўлмаслигини исботлай олди. Шунингдек, Антонио Конте ҳали кўп ишларни амалга ошириши кераклиги кўринди.

Турнинг марказий ўйинларидан бири Дортмундда бўлиб ўтди. «Боруссия» клуби гуруҳ фаворити «Барселона» билан ўйнади. Учрашувнинг дастлабки бўлими тенг курашлар остида ўтди, танаффусдан кейин эса ташаббус тўлиқ майдон эгалари томонига ўтди. 57-дақиқада немис клуби олдинга ўтиб олиши мумкин эди, бироқ Марко Ройснинг пенальтидан йўлаган зарбасини Марк-Андре тер Штеген қайтариб қолди. Қолган вақтда ҳам германиялик посбоннинг сейвлари каталонларни муқаррар голлардан сақлаб қолди. «Барселона» 80-дақиқадан кейин олдинга ўта бошлади ва бир нечта имкониятларга эга бўлди. Бироқ қизиқарли ўтган учрашув голсиз якун топди.

«G» гуруҳи

Бу гуруҳда яққол фаворит бўлмасада, барча жамоалар тенг кучли экани билан ажралиб турибди. «Лейпциг» Лиссабонга сафар қилди ва «Бенфика» билан баҳс юритди. Тимо Вернернинг дублига португаллар Ҳарис Сеферовичнинг аниқ зарбаси билан жавоб қайтарди. Ўйин мобайнида мезбонларда бир қатор қулай имкониятлар юзага келди, бироқ «Бенфика» футболчилар улардан самарали фойдалана олмади.

Гуруҳнинг иккинчи ўйинида «Лион» «Зенит»ни қабул қилди. Биринчи бўлим якунланиши арафасида Сардор Азмун питерликларни олдинга олиб чиқди. Бироқ француз клуби иккинчи бўлим аввалида ҳисобни тенглаштиришга муваффақ бўлди. Мемфис Депайнинг голи учрашувдаги охиргиси бўлди.

«H» гуруҳи

«Челси» Ла Лигада «Барселона»дан қақшатқич мағлубиятни қабул қилиб кайфиятсиз ҳолда Лондонга ташриф буюрган «Вaленсия» билан баҳс олиб борди. Учрашувнинг 74-дақиқасида Родриго томонидан киритилган ягона тўп испанларга уч очко тақдим этди. Ўйин якунланиши арафасида Росс Баркли пенальтини аниқ амалга ошира олмади. Бундан ташқари лондонликларнинг ёш футболчиси Мэйсон Маунт жароҳат олди. Шу тариқа Фрэнк Лэмпард Чемпионлар Лигасида мавсумни мағлубият билан бошлаган илк «Челси» мураббийига айланди.

Иккинчи учрашувда «Аякс» ўзида «Лилль» билан ўйнади. Квинси Промес, Эдсон Альварес ва Николас Тальяфиконинг голлари амстердамликларга ғалаба келтирди.

ЙЧЛнинг 17 сентябрь кунги ўйинлари бўйича рамзий терма жамоа