Toshkentda 12-sentabr, payshanba kuni O‘zbekiston va Malayziya Tashqi ishlar vazirliklari o‘rtasidagi siyosiy maslahatlashuvlarning to‘rtinchi raundi bo‘lib o‘tdi, deya xabar bermoqda O‘zbekiston TIV matbuot xizmati.
Maslahatlashuvlar chog‘ida ikki tomonlama munosabatlar siyosiy, savdo-iqtisodiy, investitsion, turizm, madaniy-gumanitar va boshqa sohalardagi hamkorlikni yanada rivojlantirish istiqbollariga urg‘u bergan holda batafsil ko‘rib chiqilgan. Turli darajadagi tashriflar bilan almashish orqali siyosiy muloqotni chuqurlashtirishning va parlamentlararo aloqalarni faollashtirishning muhim ahamiyati ta’kidlangan.
O‘zaro savdoning izchil o‘sib borayotgani mamnuniyat bilan qayd etilgan. Uning umumiy hajmlari 2018-yilda 78 million dollardan oshib, 2017-yilning ayni ko‘rsatkichidan 20 foizdan ko‘proqni tashkil etgan. Shu bilan birga tomonlarda o‘zaro savdo aylanmasini ko‘paytirish uchun ulkan salohiyat borligi e’tirof etilgan. Shu nuqtayi nazardan 10 yillik tanaffusdan so‘ng Savdo bo‘yicha qo‘shma qo‘mita yig‘ilishini qayta tiklash masalasi ko‘tarilgan.
Muzokaralarda ikki tomonlama investitsion hamkorlik va turistik almashinuvlar, ayniqsa ziyorat-turizm sohasidagi aloqalarni yanada kengaytirishning zarurligi ham aytib o‘tilgan. Madaniy-gumanitar hamkorlikni, jumladan, ta’lim, axborot-kommunikatsiya texnologiyalari va sport sohalaridagi munosabatlarni faollashtirish istiqbollariga muhim e’tibor qaratilgan.
O‘zbekiston—Malayziya sherikchiligining shartnoma-huquqiy bazasini kengaytirish masalalari alohida ko‘rib chiqilgan. Maslahatlashuvlarda xalqaro tashkilotlar doirasidagi hamkorlik masalalari, mintaqaviy va xalqaro muammolar yuzasidan ham fikr almashilgan.
Izoh (0)