Тошкентда 12 сентябрь, пайшанба куни Ўзбекистон ва Малайзия Ташқи ишлар вазирликлари ўртасидаги сиёсий маслаҳатлашувларнинг тўртинчи раунди бўлиб ўтди, дея хабар бермоқда Ўзбекистон ТИВ матбуот хизмати.
Маслаҳатлашувлар чоғида икки томонлама муносабатлар сиёсий, савдо-иқтисодий, инвестицион, туризм, маданий-гуманитар ва бошқа соҳалардаги ҳамкорликни янада ривожлантириш истиқболларига урғу берган ҳолда батафсил кўриб чиқилган. Турли даражадаги ташрифлар билан алмашиш орқали сиёсий мулоқотни чуқурлаштиришнинг ва парламентлараро алоқаларни фаоллаштиришнинг муҳим аҳамияти таъкидланган.
Ўзаро савдонинг изчил ўсиб бораётгани мамнуният билан қайд этилган. Унинг умумий ҳажмлари 2018 йилда 78 миллион доллардан ошиб, 2017 йилнинг айни кўрсаткичидан 20 фоиздан кўпроқни ташкил этган. Шу билан бирга томонларда ўзаро савдо айланмасини кўпайтириш учун улкан салоҳият борлиги эътироф этилган. Шу нуқтаи назардан 10 йиллик танаффусдан сўнг Савдо бўйича қўшма қўмита йиғилишини қайта тиклаш масаласи кўтарилган.
Музокараларда икки томонлама инвестицион ҳамкорлик ва туристик алмашинувлар, айниқса зиёрат-туризм соҳасидаги алоқаларни янада кенгайтиришнинг зарурлиги ҳам айтиб ўтилган. Маданий-гуманитар ҳамкорликни, жумладан, таълим, ахборот-коммуникация технологиялари ва спорт соҳаларидаги муносабатларни фаоллаштириш истиқболларига муҳим эътибор қаратилган.
Ўзбекистон—Малайзия шерикчилигининг шартнома-ҳуқуқий базасини кенгайтириш масалалари алоҳида кўриб чиқилган. Маслаҳатлашувларда халқаро ташкилотлар доирасидаги ҳамкорлик масалалари, минтақавий ва халқаро муаммолар юзасидан ҳам фикр алмашилган.
Изоҳ (0)