Davlat xavfsizlik xizmati Buxoro viloyati boshqarmasi hamda viloyat Ichki ishlar boshqarmasi xodimlari hamkorligida o‘tkazilgan tezkor tadbir davomida Romitan tumanining Gazli shahri yaqinidagi cho‘l hududida Xorazm viloyati Xazorasp tumanida yashovchi F.Norboyev o‘ziga tegishli bo‘lgan Isuzu rusumli avtomashinada 7,4 tonna gazokondensat mahsulotini noqonuniy ravishda olib ketayotgan vaqtda qo‘lga olindi, deb xabar beradi O‘zA.
Dastlabki surishtiruv ishlari natijasida ushbu gazokondensat mahsuloti Qorako‘l tumanida yashovchi fuqarolar E.Nurullayev, S.Quvonov, Q.Ro‘ziyev, R.Navro‘zov hamda J.Qozoqovlar tomonidan mazkur tumanining cho‘l hududidan o‘tgan quvurni yashirincha teshib, qo‘lbola moslama yordamida tortib olinganligi ma’lum bo‘ldi.
Shuningdek, Qorako‘l tumanida o‘tkazilgan boshqa bir tadbir davomida ham gaz quvurining yer ostidan o‘tuvchi qismini teshib, o‘g‘rilik qilish holati fosh etildi va mahalliy fuqaro N.Jumayev voqea joyida qo‘lga olindi. Ma’lum bo‘lishicha, N.Jumayev va uning sheriklari cho‘l hududidan o‘tgan gaz quvuridan 2,5 tonnadan ortiq gazokondensat mahsulotini noqonuniy o‘zlashtirishgan.
Hozirda yuqorida ko‘rsatilgan holatlar yuzasidan tergov-surishtiruv harakatlari olib borilmoqda.
Izoh (0)