Namanganda “XXI asrda tibbiyot va farmatsevtikani rivojlantirishda investitsiya va innovatsiyalarning roli” mavzusiga bag‘ishlangan xalqaro forum boshlandi. Bu haqda “Daryo” muxbiri Azizbek Abduvaliyev xabar bermoqda.
Forum viloyat hokimligi, Sog‘liqni saqlash va Innovatsion rivojlanish vazirliklari hamda Farmatsevtika tarmog‘ini rivojlantirish agentligi hamkorligida o‘tkazilmoqda. Unda jahonning 30 dan ortiq davlati, jumladan, Rossiya, Turkiya, Janubiy Koreya, Yaponiya, Ummon, Germaniya, Buyuk Britaniya, Fransiya, Italiya, Hindiston, Misr, Isroil, Singapur, Malayziya, Ozarbayjon, Qozog‘iston, Belarus, Bolgariya, Saudiya Arabistoni va Ukrainadan 150 nafar olim, mutaxassis va kompaniyalar vakillari ishtirok etmoqda.
Forumni Bosh vazir o‘rinbosari Aziz Abduhakimov tabrik so‘zi bilan ochib berdi. Sog‘liqni saqlash vaziri Alisher Shodmonov, viloyat hokimi Xayrullo Bozorovning chiqishlari bo‘lib o‘tmoqda.
Tadbir doirasida qator davlatlarning taniqli olimlari, sarmoyadorlari va mutaxassislari ma’ruzalar bilan chiqadi. Endokrinologiya, kardiologiya, jarrohlik, onalik va bolalik muhofazasi hamda farmatsevtika bo‘yicha seksiya yig‘ilishlari o‘tkaziladi.
Namanganda tibbiyot sohasining taniqli vakillari ishtirokida viloyat ko‘p tarmoqli, bolalar, perinatal va kardiologiya markazlari hamda “Anamed” va “Oydin shifo” xususiy klinikalarida yuqori texnologik jarrohlik amaliyotlari o‘tkaziladi.
Shuningdek, anjuman davomida Ural davlat tibbiyot universitetining Namangan davlat universitetida tashkil etilgan tibbiyot fakulteti ochilishi, xorijiy tadbirkorlar bilan farmatsevtikaga oid qator memorandumlar imzolanishi rejalashtirilgan.
Izoh (0)