2018-yilning 29-noyabr kuni Buxoro tumanidagi “Sheyxon” MFY Dexchabegi qishlog‘i hududidan oqib o‘tuvchi “Sattorobod” arig‘idan 20 yashar yigitning murdasi topilgan edi. 2019-yil 21-iyunda Buxoro viloyati sudi tomonidan qotillikni sodir etgan fuqaroga nisbatan O‘zbekiston Respublikasi Jinoyat Kodeksining 97-moddasi (qasddan odam o‘ldirish) 1-qismi qo‘llanilgan. Bu haqda “Daryo”ga viloyat sudi sudyasi Zavqiy Qurbonov ma’lum qildi.
Holatga ko‘ra, Buxoro tumanida yashovchi 1999-yilda tug‘ilgan marhum Shahzod Salomov Buxoro shahrida tug‘ilgan tengdoshi Aslonbek Usmonov bilan oldindan tanish bo‘lgan.
Aslonbek Usmonov o‘zi yoqtirgan qiz 2000-yilda tug‘ilgan qiz Naimova Kamola (qizning ismi sharifi o‘zgartirilgan)ning Shahzod Salomovda ko‘ngli borligidan xabar topgan va rashk oqibatida Shahzodni o‘ldirish payiga tushgan.
Shu maqsadda Aslonbek Shahzodni Buxoro shahridagi “Rohat” avtobekatiga chaqirgan. Ikki yigit Shahzod Salomovga tegishli Matiz rusumli davlat belgisi 80 R 308 VA raqamli avtomashina salonida qattiq janjallashib qolgan.
Aslonbek Usmonov o‘zi bilan birga olib kelgan oshxona pichog‘i bilan Shahzod Salomovning ko‘krak qafasi oldi va yuzasiga 2 marta, chap yelka kamari sohasiga 2 marta va chap qo‘ltiqosti sohasiga 1 marotaba urib, jarohat yetkazib, qasddan odam o‘ldirish jinoyatini sodir etgan.
Aslonbek Usmonov o‘z jinoyatini yashirish maqsadida Shahzod Salomovning shaxsiy mashinasidan foydalanib, uning murdasini Buxoro tumanidagi “Sattorobod” arig‘iga tashlagan. Unga tegishli avtomashinani esa Do‘lama qishlog‘i hududidan o‘tuvchi avtomobil yo‘li yoqasiga qulflangan holatda tashlab ketgan.
Aslonbek qotillik jinoyatini sodir etib, jasadni “g‘oyib” qilib qaytayotgan chog‘ida voqelikka avvaldan uning tanishi bo‘lgan 1998-yilda tug‘ilgan Jahongir Jabborov guvoh bo‘lgan. Shahzodning qasddan o‘ldirganligi bilan bog‘liq bo‘lgan barcha holatlarni batafsil ravishda yaqqol bilgan va murdani o‘z ko‘zi bilan ko‘rgan. Qotillik o‘ta og‘ir jinoyatlar turkumiga kirishini bila turib, do‘sti Aslonbekni uning ham hayotiga zarar yetkazishi mumkinligidan qattiq qo‘rqqan. Shu sababli, Aslonbek oldida o‘zini hech narsani ko‘rmagandek tutishga majbur bo‘lgan. Va bu haqda esa huquqni muhofaza qiluvchi organlarga xabar bermagan.
2018-yil 30-noyabr Buxoro tumani IIB vakillarining tezkor sa’y-harakatlar natijasida sodir etilgan jinoyat aniqlangan. Shundan so‘nggina Jahongir do‘sti Aslonbek tomonidan sodir etilgan qotillik jinoyati haqida iqrorlik ko‘rsatuvini bergan.
Endigina 20 yoshda bo‘lgan fuqaro Aslonbek Usmonov tomonidan sodir etilgan qotillik sabablari o‘rganilgan. Unga nisbatan O‘zbekiston Respublikasi Jinoyat Kodeksining 97-moddasining 1-qismi qo‘llanilgan va 13 yilga ozodlikdan mahrum qilingan.
Qotillik jinoyatini qasddan yashirgan Jahongir Jabborovga Jinoyat Kodeksining 241-moddasining 2-qismida nazarda tutilgan jinoyatni sodir etganlikda aybli deb topilib, 4 yil ozodlikni cheklash jazosi tayinlangan.
Izoh (0)