Давлат раҳбарининг 2018 йил 13 апрелда Сирдарё вилояти Сайхунобод туманида вилоят фаоллари билан учрашувда қўшни Тожикистон билан чегарадош Ховос туманидаги «Чамбил», «Фарҳод» ва «Бобур» сув истеъмолчилари уюшмалари ҳудудида оқова сув таъминотидаги муаммоларни ҳал қилиб бериш бўйича аҳолидан мурожаат қилинганди.
Сирдарё вилояти прокуратураси Жамоатчилик билан алоқалар ва ҳуқуқий ахборот тармоғининг «Дарё»га хабар беришича, Президент томонидан аҳоли мурожаатига дарҳол эътибор қаратилди ҳамда ушбу топшириқлар ижросини назорат қилиш вилоят прокуратурасига юклатилди.
Ўтган йил баҳор ойларида бошланган канал қурилишида ўндан ортиқ махсус техника ва мингдан ортиқ ишчилар қатнашди. Лойиҳа қиймати 23 миллард сўмга тенг бўлган иншоотнинг барпо этилиши билан сониясига 2,2 метр куб сув ўтказиш қувватига эга бўлган замонавий насос станцияси ҳам қуриб битказилди.
Узунлиги 11 километрни ташкил этадиган мазкур канал қурилишида 5 126 мер куб бетон ишлари бажарилди. Мазкур лойиҳанинг аҳамияти ҳақида гапирадиган бўлсак, иншоот ишга туширилиши билан туманнинг «Чамбил», «Фарҳод» ва «Бобур» сув истеъмолчилари уюшмалари ҳудудидаги 4 минг гектар ер ҳамда 3 ярим мингта аҳоли хонадонлари экин майдонлари ва томорқа хўжаликларидаги сув таъминоти яхшиланди.
Президент топшириқлари ижроси таъминланди ва сирдарёликлар ҳаётидаги бу тарихий воқеа — канал қурилиши инсонлар ҳаёти фаровонлиги йўлида яна бир муҳим қадам бўлди.
Республика «Нуроний» жамғармасининг Ховос тумани бўлими раиси Жумабой Суюнов ва маҳалла оқсоқоли Хидир Юсупов кўп йиллик орзулари амалга ошганлигидан миннатдор бўлиб, шукроналик билдирди, дейилади хабарда.
Изоҳ (0)