30-avgust kuni Omsk viloyatining Moskalenki tumanidagi avtomobil yo‘lida sodir bo‘lgan yo‘l-transport hodisasi oqibatida uch kishi, xususan, ikki nafar O‘zbekiston fuqarosi halok bo‘lgan. Bu haqda O‘zbekistonning Novosibirsk shahridagi Bosh konsulxonasiga tayanib, Tashqi ishlar vazirligi xabar berdi.
Shuningdek, yana ikki nafar O‘zbekiston fuqarosi turli darajadagi ko‘p sonli og‘ir jarohatlar olib, Moskalenki tuman kasalxonasiga yotqizilgan. Ularga tegishli yordam ko‘rsatilmoqda hamda Omsk shahridan mutaxassislar ham chaqirtirildi.
“Bosh konsulxona vaziyatni nazoratga olgan, Omsk viloyati huquqni muhofaza qiluvchi organlari va davolovchi shifokorlar bilan aloqa o‘rnatgan. Hozirda O‘zbekiston fuqarolarining jasadlarini vatanga yuborish va jabrlanganlarga yordam ko‘rsatish bilan bog‘liq konsullik-huquqiy va tashkiliy masalalar hal qilinmoqda”, — deyiladi xabarda.
Omsk viloyati Yo‘l harakati xavfsizligi davlat inspeksiyasi xabariga ko‘ra, mazkur hodisa yuzasidan jinoyat ishi qo‘zg‘atiladi.
Konsullik-huquqiy departamenti marhumlarning oila a’zolari va yaqinlariga hamdardlik izhor etadi hamda Rossiyaning Sibir federal okrugi (Oltoy Respublikasi, Oltoy o‘lkasi, Buryatiya Respublikasi, Irkutsk viloyati, Baykal orti o‘lkasi, Kemerovo viloyati, Krasnoyarsk o‘lkasi, Novosibirsk viloyati, Novosibirsk shahri, Omsk viloyati, Tomsk viloyati, Tuva Respublikasi, Hakasiya Respublikasi) hududida bo‘lib turgan O‘zbekiston fuqarolariga ular zarurat tug‘ilgan holatlarda O‘zbekistonning Novosibirsk shahridagi Bosh konsulxonasiga quyidagi telefon raqamlari orqali murojaat qilishlari mumkinligini eslatib o‘tadi: +7-383-246-04-85, +7-383-246-04-84, +7-383-246-04-63, +7-383-246-04-64.
Izoh (0)