Qanot Sharq xususiy kompaniyasi Superjet samolyotlariga shartnoma (yetkazib berish haqidagi bitimni nazarda tutadi) imzoladi, deb xabar beradi Spot.
Shartnoma “Xalqaro aviatsion-kosmik salon—2019” tadbiri doirasida imzolangan.
Qayd etilishicha, Qanot Sharq Rossiyaning Sukhoi Civil Aircraft Company (SСАC) kompaniyasidan uchta Superjet 100 samolyotini lizingga olishni rejalashtirmoqda.
Avgust oyida kompaniya muassisi Nosir Abdug‘afforov “Kun.uz”ga bergan intervyusida Qanot Sharq O‘zbekistonda hududiy aviakompaniya tashkil etishni rejalashtirayotganini ma’lum qilgan edi.
“O‘tgan yil noyabrda prezident farmoni chiqqanidan so‘ng (“O‘zbekiston Respublikasining fuqaro aviatsiyasini tubdan takomillashtirish chora-tadbirlari to‘g‘risida”) biz aviakompaniyani hududiy aviatashuvchi sifatida qayta jonlantirishga qaror qildik. Biz hududiy texnika ishlab chiqaruvchi uchta yetakchi — Embraer (Braziliya), Bombardier (Kanada) va Sukhoi (RF) kompaniyalari bilan uchrashdik. Parvozlar geografiyasi, parvoz jadvali ishlab chiqilmoqda. Shuningdek, aviakompaniyaning tashkiliy tuzilmasi tayyorlanmoqda”, — degan edi Abdug‘afforov.
Qanot Sharq 1998-yilda ro‘yxatga olingan hamda yuk va yo‘lovchi aviatashuvlariga ixtisoslashgan. 2003-yildan 2012-yilgacha kompaniya “O‘zbekiston havo yo‘llari” MAKdan Il-76 samolyotlarini ijaraga olgan va O‘zbekistondagi birinchi xususiy aviakompaniya o‘laroq o‘z charter reyslarini amalga oshirgan. Kompaniya 150 mingdan ortiq yo‘lovchi tashigan. Barcha Il-76 samolyotlari O‘zbekiston Mudofaa vazirligiga o‘tkazilgach, Qanot Sharq’ning ekspluatantlik sertifikati to‘xtatilgan.
Sukhoi Superjet 100 — Rossiyaning 98 nafar yo‘lovchi sig‘imiga ega, 3000 yoki 4600 kilometr masofaga uchuvchi samolyoti.
Mazkur samolyot SSR tarqatilganidan so‘ng Rossiyada ishlab chiqarilgan birinchi yo‘lovchi samolyoti hisoblanadi.
Izoh (0)