Qanot Sharq учта Superjet самолётини етказиб бериш бўйича шартномани имзолади

Qanot Sharq хусусий компанияси Superjet самолётларига шартнома (етказиб бериш ҳақидаги битимни назарда тутади) имзолади, деб хабар беради Spot.

Шартнома «Халқаро авиацион-космик салон—2019» тадбири доирасида имзоланган.

Қайд этилишича, Qanot Sharq Россиянинг Sukhoi Civil Aircraft Company (SСАC) компаниясидан учта Superjet 100 самолётини лизингга олишни режалаштирмоқда.

Август ойида компания муассиси Носир Абдуғаффоров «Kun.uz»га берган интервьюсида Qanot Sharq Ўзбекистонда ҳудудий авиакомпания ташкил этишни режалаштираётганини маълум қилган эди.

«Ўтган йил ноябрда президент фармони чиққанидан сўнг («Ўзбекистон Республикасининг фуқаро авиациясини тубдан такомиллаштириш чора-тадбирлари тўғрисида») биз авиакомпанияни ҳудудий авиаташувчи сифатида қайта жонлантиришга қарор қилдик. Биз ҳудудий техника ишлаб чиқарувчи учта етакчи — Embraer (Бразилия), Bombardier (Канада) ва Sukhoi (РФ) компаниялари билан учрашдик. Парвозлар географияси, парвоз жадвали ишлаб чиқилмоқда. Шунингдек, авиакомпаниянинг ташкилий тузилмаси тайёрланмоқда», — деган эди Абдуғаффоров.

Qanot Sharq 1998 йилда рўйхатга олинган ҳамда юк ва йўловчи авиаташувларига ихтисослашган. 2003 йилдан 2012 йилгача компания «Ўзбекистон ҳаво йўллари» МАКдан Ил-76 самолётларини ижарага олган ва Ўзбекистондаги биринчи хусусий авиакомпания ўлароқ ўз чартер рейсларини амалга оширган. Компания 150 мингдан ортиқ йўловчи ташиган. Барча Ил-76 самолётлари Ўзбекистон Мудофаа вазирлигига ўтказилгач, Qanot Sharq’нинг эксплуатантлик сертификати тўхтатилган.

Sukhoi Superjet 100 — Россиянинг 98 нафар йўловчи сиғимига эга, 3000 ёки 4600 километр масофага учувчи самолёти.

Мазкур самолёт ССР тарқатилганидан сўнг Россияда ишлаб чиқарилган биринчи йўловчи самолёти ҳисобланади.