29-avgust kuni Qibray tuman IIB kichik serjanti Tohir Normatov hamda Chirchiq shahri Yo‘l harakati xavfsizligi bo‘limi inspektori, ryadavoy Farhod Ubaydullayevga ichki ishlar vaziri o‘rinbosari general-mayor Jo‘rayev tomonidan minnatdorchilik bildirilib, qimmatbaho sovg‘alar topshirildi. Bu haqda Toshkent shahar IIBB xabar berdi.
25-avgust kuni Toshkentda bir necha bor sudlagan M.M ismli shaxs tomonidan “VAZ-2106” rusumli avtomobil o‘g‘irlab qochilgan. Avtomobil egasi “Yunusobod” bozoriga kirib ketganida, mashina eshiklarini ochiq qoldirgan. Yarim soatdan so‘ng qaytib kelib, mashinasini turargohdan topa olmagan va zudlik bilan militsiyaga qo‘ng‘iroq qilgan.
Navbatchiga qo‘ng‘iroq soat 17:00 da kelib tushgan va tezkorlik bilan “qo‘lga olish” rejasi e’lon qilingan. 20 daqiqadan so‘ng Toshkent shahar IIBBga Toshkent viloyatidagi hamkasblaridan o‘g‘irlangan mashina “TashGRES” postida to‘xtatilgani haqida xabar kelib tushgan.
Qo‘lga olish e’lon qilingan vaqtda Qibray tumani IIB xodimi kichik serjant Normatov hamda ryadavoy Ubaydullayev yaqin o‘rtada o‘z xizmat faoliyatini olib borayotgan bo‘lgan. Ular ratsiya orqali berilgan ma’lumotlar yordamida harakatlanib, o‘g‘irlangan avtomobilni to‘xtatgan va ichidagi mast haydovchini qo‘lga olgan.
Avtomobil o‘g‘risining yoshi 37 da bo‘lib, asli qoraqalpog‘istonlik. Besh marotaba o‘g‘rilik uchun sudlangan. Oxirgi marta Mirobod tuman jinoyat ishlari sudi tomonidan 8 yilga ozodlikdan mahrum etilgan. Joriy yilning aprelida sog‘lig‘i yomonlashgani sabab muddatidan oldin ozodlikka chiqarilgan edi.
Izoh (0)