29 август куни Қибрай туман ИИБ кичик сержанти Тоҳир Норматов ҳамда Чирчиқ шаҳри Йўл ҳаракати хавфсизлиги бўлими инспектори, рядавой Фарҳод Убайдуллаевга ички ишлар вазири ўринбосари генерал майор Жўраев томонидан миннатдорчилик билдирилиб, қимматбаҳо совғалар топширилди. Бу ҳақда Тошкент шаҳар ИИББ хабар берди.
25 август куни Тошкентда бир неча бор судлаган М.М исмли шахс томонидан «ВАЗ-2106» русумли автомобиль ўғирлаб қочилган. Автомобиль эгаси «Юнусобод» бозорига кириб кетганида, машина эшикларини очиқ қолдирган. Ярим соатдан сўнг қайтиб келиб, машинасини тураргоҳдан топа олмаган ва зудлик билан милицияга қўнғироқ қилган.
Навбатчига қўнғироқ соат 17:00 да келиб тушган ва тезкорлик билан «қўлга олиш» режаси эълон қилинган. 20 дақиқадан сўнг Тошкент шаҳар ИИББга Тошкент вилоятидаги ҳамкасбларидан ўғирланган машина «ТашГРЕС» постида тўхтатилгани ҳақида хабар келиб тушган.
Қўлга олиш эълон қилинган вақтда Қибрай тумани ИИБ ходими кичик сержант Норматов ҳамда рядавой Убайдуллаев яқин ўртада ўз хизмат фаолиятини олиб бораётган бўлган. Улар рация орқали берилган маълумотлар ёрдамида ҳаракатланиб, ўғирланган автомобилни тўхтатган ва ичидаги маст ҳайдовчини қўлга олган.
Автомобиль ўғрисининг ёши 37 да бўлиб, асли қорақалпоғистонлик. Беш маротаба ўғрилик учун судланган. Охирги марта Миробод туман жиноят ишлари суди томонидан 8 йилга озодликдан маҳрум этилган. Жорий йилнинг апрелида соғлиғи ёмонлашгани сабаб муддатидан олдин озодликка чиқарилган эди.
Изоҳ (0)