21-avgustning e’tiborga molik yangiliklari — “Daryo” dayjestida.
Adliya vazirligining matbuot xizmati O‘zbekiston qonunchiligida 2019-yil 1-sentabrdan boshlab kutilayotgan o‘zgarishlar to‘g‘risida ma’lumot berdi.
Kuzning ilk kunidan boshlab O‘zbekistonda quyidagi o‘zgarishlar kutilmoqda:
O‘zbekiston Respublikasida erkaklar va ayollar uchun nikoh yoshi bir xilda o‘n sakkiz yosh etib belgilanadi.
Tovar belgisini ro‘yxatdan o‘tkazish uchun taqdim etiladigan talabnomalar faqat elektron shaklda davlat xizmatlari markazlari yoki Yagona interaktiv davlat xizmatlari portali orqali topshiriladi.
Yangi “O‘zbekiston tarixi” telekanali o‘z faoliyatini boshlaydi.
***
“Yuventus” klubi hujumchisi Krishtianu Ronaldu AS nashriga bergan intervyusida faoliyatini qachon yakunlashi borasidagi savolga javob qaytardi.
“Faoliyatimni qachon yakunlayman? Bilmadim. Balki, keyingi yiliyoq yakunlarman. Biroq 40 yoki 41 yoshgacha o‘ynashim ham mumkin. Buni aniq bilmayman. Bugungi kundan zavq olish kerakligini har doim aytib kelganman. Men bu ishni qilishda davom etmoqchiman”, — deydi portugaliyalik futbolchi.
***
Olmaliq shahri Abdulla Qahhor ko‘chasida yashovchi 25 yoshli M.A. 18 yoshli ukasi A.A. bilan mobil telefonini talashib qolib, o‘zaro kelib chiqqan janjal natijasida oshxona pichog‘i bilan ukasining bo‘yin sohasiga bir marotaba sanchib, tan jarohati yetkazgan.
A.A. otasi tomonidan shifoxonaga olib borilayotgan vaqtda, yo‘lda vafot etgan.
***
O‘zbekiston milliy teleradiokompaniyasining “Mahalla” telekanali binosi yonib ketdi.
Aytishlaricha, yong‘in telekanal binosiga kiraverishdagi oshxonadan boshlanib, binoning oxirigacha davom etgan.
“O‘t o‘chirish va qo‘riqlash xizmatlariga ega joyda bunday ko‘ngilsizlik bo‘lishi qiziq”, — deyiladi bu haqda ma’lum qilgan “U24” portali xabarida.
***
Gruziyaning “Rustavi 2” telekompaniyasi yangi bosh direktori Paata Saliya telekanalning bir qator jurnalistlari, jumladan, to‘g‘ridan to‘g‘ri efir orqali Rossiya prezidenti Vladimir Putinni haqorat qilgan Georgiy Gabuniya ishdan bo‘shatilganini ma’lum qilgandi.
Gabuniya aytgan haqoratli so‘zlari uchun kechirim so‘ramasligini bildirdi.
***
20-avgustdan O‘zbekiston tijorat banklari tomonidan valyuta ayirboshlash shoxobchalarida naqd valyuta — dollar sotish boshlangan edi. Hozirda aksariyat valyuta ayirboshlash joylari oldida navbatlar yuzaga kelgan.
***
Kattaqo‘rg‘onda o‘z jiyanini urib o‘ldirgan tog‘alar 8 yilga qamaldi. Farzand dog‘ini ko‘tara olmagan ota esa o‘z joniga qasd qildi.
Zafar va Husan Hayitovlar voyaga yetmagan jiyani Behruz Abduhakimovni onasi D.Hayitova va voyaga yetmagan singlisi D.Abduhakimovaning ko‘z o‘ngida oyog‘idan arqon bilan shiftga osib qo‘yadi. Oyog‘idan osilgan Behruz Abduhakimovni tog‘alari o‘ta shafqatsizlik bilan tanasining turli joylariga tayoq bilan bir necha marta qasddan urib tan jarohati yetkazgan. D.Hayitova akalariga o‘g‘lini urmasligini iltimos qilishiga qaramasdan ular urishda davom etgan. Natijada Behruz og‘ir tan jarohati olib voqea joyida vafot etgan.
2019-yil 23-iyun kuni marhum Behruz Abduhakimovning otasi Sh.Tursunov ushbu judolikka chidolmasdan o‘z joniga qasd qilib vafot etgan.
Izoh (0)