21 августнинг эътиборга молик янгиликлари — «Дарё» дайжестида.
Адлия вазирлигининг матбуот хизмати Ўзбекистон қонунчилигида 2019 йил 1 сентябрдан бошлаб кутилаётган ўзгаришлар тўғрисида маълумот берди.
Кузнинг илк кунидан бошлаб Ўзбекистонда қуйидаги ўзгаришлар кутилмоқда:
Ўзбекистон Республикасида эркаклар ва аёллар учун никоҳ ёши бир хилда ўн саккиз ёш этиб белгиланади.
Товар белгисини рўйхатдан ўтказиш учун тақдим этиладиган талабномалар фақат электрон шаклда давлат хизматлари марказлари ёки Ягона интерактив давлат хизматлари портали орқали топширилади.
Янги «Ўзбекистон тарихи» телеканали ўз фаолиятини бошлайди.
***
«Ювентус» клуби ҳужумчиси Криштиану Роналду AS нашрига берган интервьюсида фаолиятини қачон якунлаши борасидаги саволга жавоб қайтарди.
«Фаолиятимни қачон якунлайман? Билмадим. Балки, кейинги йилиёқ якунларман. Бироқ 40 ёки 41 ёшгача ўйнашим ҳам мумкин. Буни аниқ билмайман. Бугунги кундан завқ олиш кераклигини ҳар доим айтиб келганман. Мен бу ишни қилишда давом этмоқчиман», — дейди португалиялик футболчи.
***
Олмалиқ шаҳри Абдулла Қаҳҳор кўчасида яшовчи 25 ёшли М.А. 18 ёшли укаси А.А. билан мобил телефонини талашиб қолиб, ўзаро келиб чиққан жанжал натижасида ошхона пичоғи билан укасининг бўйин соҳасига бир маротаба санчиб, тан жароҳати етказган.
А.А. отаси томонидан шифохонага олиб борилаётган вақтда, йўлда вафот этган.
***
Ўзбекистон миллий телерадиокомпаниясининг «Маҳалла» телеканали биноси ёниб кетди.
Айтишларича, ёнғин телеканал биносига кираверишдаги ошхонадан бошланиб, бинонинг охиригача давом этган.
«Ўт ўчириш ва қўриқлаш хизматларига эга жойда бундай кўнгилсизлик бўлиши қизиқ», — дейилади бу ҳақда маълум қилган «У24» портали хабарида.
***
Грузиянинг «Рустави 2» телекомпанияси янги бош директори Паата Салия телеканалнинг бир қатор журналистлари, жумладан, тўғридан-тўғри эфир орқали Россия президенти Владимир Путинни ҳақорат қилган Георгий Габуния ишдан бўшатилганини маълум қилганди.
Габуния айтган ҳақоратли сўзлари учун кечирим сўрамаслигини билдирди.
***
20 августдан Ўзбекистон тижорат банклари томонидан валюта айирбошлаш шохобчаларида нақд валюта — доллар сотиш бошланган эди. Ҳозирда аксарият валюта айирбошлаш жойлари олдида навбатлар юзага келган.
***
Каттақўрғонда ўз жиянини уриб ўлдирган тоғалар 8 йилга қамалди. Фарзанд доғини кўтара олмаган ота эса ўз жонига қасд қилди.
Зафар ва Ҳусан Ҳайитовлар вояга етмаган жияни Беҳруз Абдуҳакимовни онаси Д.Ҳайитова ва вояга етмаган синглиси Д.Абдуҳакимованинг кўз ўнгида оёғидан арқон билан шифтга осиб қўяди. Оёғидан осилган Беҳруз Абдуҳакимовни тоғалари ўта шафқатсизлик билан танасининг турли жойларига таёқ билан бир неча марта қасддан уриб тан жароҳати етказган. Д.Ҳайитова акаларига ўғлини урмаслигини илтимос қилишига қарамасдан улар уришда давом этган. Натижада Беҳруз оғир тан жароҳати олиб воқеа жойида вафот этган.
2019 йил 23 июнь куни марҳум Беҳруз Абдуҳакимовнинг отаси Ш.Турсунов ушбу жудоликка чидолмасдан ўз жонига қасд қилиб вафот этган.
Изоҳ (0)