Sirdaryo viloyatida 22-avgust kuni I xalqaro investitsiya forumi bo‘lib o‘tadi. Bu haqda viloyat hokimligi matbuot xizmati “Daryo”ga ma’lum qildi.
Xabarda aytilishicha, forumda 200 dan ortiq xorijiy kompaniya rahbarlari ishtirok etishi kutilmoqda. Forum viloyatning iqtisodiy salohiyati va mavjud imkoniyatlari to‘g‘risida xorijiy hamkorlarga ma’lumotlar berish maqsadida o‘tkazilmoqda.
Forum ishi o‘z oldiga viloyatda qishloq xo‘jaligida innovatsion yondashuvlarni ishga solish, sanoatda muqobil energiya manbalaridan foydalanishni rivojlantarish kabi ustuvor yo‘nalishlarni belgilab olgan. Shuningdek, turizm infra-tuzilmalarini hamda axborot kommunikatsiya texnologiyalarini rivojlantirish masalalarini ko‘rib chiqish ko‘zda tutilgan.
Hozirda “Sirdaryo” erkin iqtisodiy zonasiga kiritiladigan investitsiyalar hajmidan kelib chiqqan holda ishtirokchilar uchun 3 yildan 10 yilgacha bo‘lgan muddatlarga soliq va bojxona imtiyozlari mavjud. Xovos tumani hududida ham kichik sanoat zonasi tashkil qilingan bo‘lib, ushbu zonadagi bo‘sh turgan davlat bino va inshootlari tadbirkorlarga keyinchalik xususiylashtirish sharti bilan 5 yil muddatga ijaraga beriladi.
Forum doirasida “Gullar festivali”, “Qushlar ko‘rgazmasi” va “Qovun sayli” o‘tkaziladi.
Izoh (0)