Komil Allamjonov davlat idoralari matbuot kotiblari qanday sinovlar asosida lavozimga tayinlashi haqida ma’lumot berdi

Axborot va ommaviy kommunikatsiyalar agentligi direktori Komil Allamjonov davlat idoralari matbuot kotiblari qanday sinovlar asosida lavozimga tayinlashi haqida ma’lumot berdi.

Qadrli do‘stlar, siz bilan muloqot yo‘lga qo‘yilganidan buyon menga yozayotgan fikrlaringizni muntazam o‘qib bormoqdaman.

Menga davlat idoralari matbuot kotiblari qanday sinovlar asosida lavozimga tayinlashi va bu jarayonda Agentligimizning ishtiroki, xolislik qay darajada ta’minlanishi haqida so‘rab, ko‘p murojaat yo‘llashyapti. Shu mavzudagi savollar hozirga qadar takrorlanayotgani uchun ularga javob bermoqchiman.

Prezident qarorida (http://lex.uz/docs/4390513) davlat axborot siyosatini amalga oshirishda matbuot xizmatlarining birinchi axborot manbai sifatidagi o‘rnini mustahkamlash masalalariga alohida e’tibor qaratilgan.

Qaror bilan axborot xizmati rahbari bir vaqtning o‘zida davlat organi rahbarining matbuot kotibi — axborot siyosati masalalari bo‘yicha maslahatchisi maqomida bo‘lishi hamda Axborot va ommaviy kommunikatsiyalar agentligi xulosasini inobatga olgan holda, lavozimga tayinlanishi belgilangan.

Hozirga qadar Prezident qarori talablariga asosan Agentlikda 58 ta davlat va xo‘jalik boshqaruvi organi tomonidan matbuot kotibi lavozimiga tavsiya etilgan 60 ta nomzod bilan suhbat tashkil etildi.

Shulardan 41 tasi suhbatdan muvafaqqiyatli o‘tdi hamda rahbarning matbuot kotibi lavozimiga loyiq deb topilib, ularga Agentlik tavsiyalari berildi. 11 ta nomzod suhbatdan shartli ravishda o‘tdi. 6 ta nomzod esa suhbatdan o‘ta olmadi.

Ta’kidlashim kerakki, xolislikni ta’minlash maqsadida suhbatlarni yuqori bilim va salohiyatga ega mas’ul mutasaddilar, tajribali va o‘z ishiga vijdonan yondashadigan soha mutaxassislaridan iborat hay’at olib bordi.

Suhbatdan o‘tgan barcha nomzodlarni samimiy qutlab, mamlakatimizda davlatimiz rahbari tomonidan izchillik bilan olib borilayotgan ochiqlik siyosatiga astoydil xizmat qilishlari, respublikamizning xalqaro maydondagi imijini munosib tarzda yanada yuksaltirish borasidagi sa’y-harakatlarida muvaffaqiyat tilayman.

Komil Allamjonov, Axborot va ommaviy kommunikatsiyalar agentligi direktori