11-avgust, yakshanba kuni beshinchi bor o‘tkazilayotgan Xalqaro armiya o‘yinlarining “Xavfsiz marshrut” yo‘nalishi yakuniga yetdi. Unda o‘zbekistonlik harbiylar kuchli uchlikdan o‘rin oldi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Rossiya Federatsiyasining Tyumen viloyatida joylashgan dala-o‘quv maydonida bo‘lib o‘tgan yarim final bahsida kurash olib borgan o‘zbeksitonlik harbiylar marrani qo‘ldan boy bermaslikka harakat qildi.
Harbiy musobaqa shart-sharoitlari jang holatiga maksimal yaqin bo‘lishi uchun 6000 metrga yaqin bellashuv yo‘lagiga 250 dan ziyod imitatsion, signal va portlovchi-yonuvchi zaryadlardan iborat elektroportlovchi tarmoq yotqizib chiqildi. Musobaqa Su-24 front bombardimonchisi va Mi-8 transport-jangari vertolyotlarining shartli aviazarbalari sharoitida boshlandi. Belarus, Vyetnam, O‘zbekiston hamda Rossiya jamoalari o‘rtasida o‘tkazilgan final bosqichi qizg‘in bellashuvlarga boy kechdi.
“Vertolyot maketidan desantlashtirilgan holatida tushish, osma ko‘prik va setkali devor to‘siqlardan o‘tish, binoni portlatib, ishg‘ol qilish, sim to‘siqli mina maydonni tozalash hamda suvli to‘siqlardan o‘tish shartlarida o‘zbek muhandis-sapyorlari peshqadamlik qildi”, — deyiladi xabarda.
O‘zbekistonlik harbiylar uzunligi 30 va 6 metr bo‘lgan hududni minalardan tozalash, uzunligi 40 metr bo‘lgan suv havzasiga TMM-3 (og‘ir mexanizatsiyalashgan ko‘prik) texnikalari yordamida ko‘prik o‘rnatib, shaxsiy tarkibga yo‘l ochish shartlaridagi aniq harakatlari tomoshabinlar olqishiga sazovar bo‘ldi. BAT-2 yo‘l quruvchi va IMR-2 to‘siqlardan o‘tish muhandislik texnikasi yordamida berilgan shartlarni to‘laqonli bajarishga harakat qildi.
Yakuniy natijalarga ko‘ra, O‘zbekiston jamoasi mazkur musobaqada uchinchi o‘ringa loyiq deb topildi. Rossiya birinchi, Belarusga esa ikkinchi o‘rin nasib etdi.
Musobaqa davomida BAT-2 yo‘l quruvchi muhandislik texnikasi ekipaji a’zolari — mexanik-haydovchi, shartnoma bo‘yicha harbiy xizmatchi, oddiy askar Shavqiddin Narzullayev va BAT-2 yo‘l quruvchi muhandislik texnikasi hisobi, kichik serjant Feruz Guchchiyev “ArMI—2019” Xalqaro armiya o‘yinlarining “Xavfsiz marshrut” musobaqasida “Eng ilg‘or BAT-2 ekipaji” nominatsiyasi g‘olibi deya e’tirof etildi.
Eslatib o‘tamiz, III va IV Xalqaro armiya o‘yinlarining “Xavfsiz marshrut” musobaqalarida ham hamyurtlarimiz 3-o‘rinni qo‘lga kiritgan edi.
Izoh (0)