Pekinda ShHT kuni munosabati bilan 21-iyun kuni o‘tkazilgan tantanali qabul doirasida “ShHTning 8 mo‘jizasi” mavzusidagi taqdimot bo‘lib o‘tdi. Bu haqda Turizmni rivojlantirish davlat qo‘mitasi xabar berdi.
ShHT kotibiyati tomonidan tashkil etilgan tadbirda 600 dan ziyod siyosiy, ijtimoiy, biznes doiralar va diplomatik korpus vakillari ishtirok etgan. ShHT bosh kotibi Vladimir Norov o‘z nutqida 18 yil avval tashkilotga asos solishga doir qabul qilingan qaror va unga a’zo davlatlarning tinchlik va barqarorlikka yo‘naltirilgan muhim strategik tanlovi bo‘lganini ta’kidlagan.
Nufuzli mehmonlar bosh kotib hamrohligida “ShHTning 8 mo‘jizasi” ko‘rgazmasini ko‘zdan kechirgan. Ko‘rgazmadan ShHT mamlakatlari tabiati, urf-odatlari, an’anaviy liboslari, hunarmandchilik mahsulotlari va milliy taomlariga bag‘ishlangan fotomateriallar, videoroliklar va qo‘llanmalar o‘rin olgan.
“ShHTning 8 mo‘jizasi” ro‘yxatidan Poi Kalon me’moriy ansambli ham o‘rin olgan bo‘lib, tashkilotga asos solingan kuni ushbu tarixiy maskanning taqdimoti ham o‘tkazilgan.
Poi Kalon me’moriy ansambli Minorai Kalon atrofidagi hududni o‘z ichiga oladi. Kompleks 12—14-asrlarda 3 binodan iborat bo‘lgan: Minorai Kalon, Masjidi Kalon va Mir Arab madrasasi. Minorai Kalon 1127-yilda Arslonxon tomonidan bunyod etilgan bo‘lib, deyarli 900 yil davomida ta’mirlanmagan. Uning balandligi 46,5 metrni tashkil qiladi.
Izoh (0)