Farg‘ona shahridagi Tadbirkorlar markazida Xalqaro investitsiya forumi boshlandi. Bu haqda “Daryo” muxbiri xabar bermoqda.
Unda Janubiy Koreya, Xitoy, Saudiya Arabistoni, Hindiston, Eron, Rossiya, Turkiya, Belarus kabi 30 ga yaqin davlatning mamlakatda faoliyatini yo‘lga qo‘yish istagida bo‘lgan 300 dan ortiq ishbilarmoni, 12 ta mamlakatning O‘zbekistondagi elchixonasi vakillari ishtirok etmoqda.
Forumning ochilish marosimida so‘zga chiqqan Farg‘ona viloyati hokimi Shuhrat G‘aniyev, Savdo-sanoat palatasi raisi Adham Ikromov, Investitsiyalar va tashqi savdo vaziri o‘rinbosari Farrux Rahimov iqtisodiyot tarmoqlari va hududlarga xorijiy sarmoyalarning kirib kelishi faollashgani, Farg‘ona viloyatida ushbu ko‘rsatkich o‘tgan yilning mos davriga nisbatan 3,9 marotabaga ortganini qayd etdi.
Ayni paytda xorijiy davlatlarning biznes hamjamiyati, xalqaro tashkilotlar vakillari viloyatdagi investitsiya loyihalarini amalga oshirish uchun mavjud salohiyat, imkoniyatlar bilan tanishtirilmoqda.
Ikki kun davom etadigan forum davomida ishtirokchilar e’tiboriga “Farg‘onada ishlab chiqarilgan” nomi ostida viloyatda tayyorlangan mahsulotlar ko‘rgazmasi, investitsiya loyihalari va foydalanilmayotgan sanoat binolari taqdimoti bo‘lib o‘tadi.
Shuningdek, mahalliy ishlab chiqarish korxonalariga tashrif tashkil etilib, ularning faoliyati bilan yaqindan tanishish imkoni yaratiladi.
Forum davomida O‘zbekistonning xorijiy davlatlardagi elchixonalari bilan birgalikda viloyatga to‘g‘ridan-to‘g‘ri xorijiy investitsiyalarni jalb qilishni ko‘zda tutadigan 100 dan ortiq kelishuvlarning imzolanishi kutilmoqda.
Forum davom etmoqda.
Izoh (0)