Innovatsion rivojlanish vazirligi hamda BMT Taraqqiyot dasturi hamkorligidagi Innovatsiyalar va boshqaruv yechimlari laboratoriyasida maktabgacha ta’lim muassasalariga qabul jarayonini mukammallashtirish bo‘yicha tavsiyalar muhokama qilindi. Bu haqda “Daryo”ga vazirlik matbuot xizmati ma’lum qildi.
Mazkur tavsiyalar maktabgacha ta’lim muassasalariga qabul jarayonini soddalashtirishga, korrupsiyaga imkon qoldirmaslikka hamda fuqarolarga qulaylik yaratishga qaratilgan.
Loyiha mualliflari davlat maktabgacha ta’lim muassasalariga qabul jarayonining mavjud holatini tahlil qilib, bugungi kunda Davlat xizmatlari markazlari orqali bo‘sh joyga yo‘llanma olish uchun 16 ta bosqichdan o‘tilishi aniqlandi. Bu jarayonda elektron raqamli imzo sotib olish majburiyati, bo‘sh joylar haqida ma’lumotlarning o‘z vaqtida yangilanmasligi va haqiqatga mos emasligi, Yagona interaktiv davlat xizmatlari portali va OpenEMIS axborot tizimi o‘rtasidagi tafovutning mavjudligi aholi tomonidan norozilikka sabab bo‘lgan. Bundan tashqari, arizachilar navbat kelgan-kelmaganini bilish uchun bir necha marotaba Davlat xizmatlari markaziga borib-kelishiga to‘g‘ri kelmoqda.
— Me’yoriy-huquqiy bazadagi ayrim kamchiliklar bartaraf etilmasa, muammo hal bo‘lmaydi, — deydi loyiha muallifi Bunyod Hoshimxo‘jayev. — Inson omili, ya’ni tuman maktabgacha ta’lim bo‘limlari mas’ul xodimlarining yo‘llanma berishdagi ishtirokiga butkul chek qo‘yish kerak. Bog‘chalarda AKTning qisman qo‘llanilishi, muassasaga qabul qilingan va u yerdan ketgan bolalar haqidagi ma’lumotlar bazasining yo‘qligi, harakatlarning muvofiqlashtirilmagani ham muammolar keltirib chiqarmoqda.
Loyiha mualliflari tomonidan bolalarni maktabgacha ta’lim muassasalariga joylashni yanada mukammallashtirish maqsadida elektron raqamli imzo olishni bekor qilish taklif etilmoqda. Shuningdek, maktabgacha ta’lim muassasalariga qabul jarayonida imtiyozlardan foydalanuvchilarning turini kamaytirish lozimligiga ham alohida urg‘u berildi. Bunda faqatgina ijtimoiy himoyasiz aholi qatlamlarigagina bunday imtiyozlarni saqlab qolish zarurligi qayd etildi.
Tizimning mukammal ishlashi uchun faqat tashkiliy jihatlarga emas, balki qabulga yo‘llanma berish jarayonining texnik tomoniga ham alohida ahamiyat qaratish lozim. Bunda OpenEMIS tizimi va bu tizimni Yagona portal bilan muvofiqlashtirish ustida dasturchilar ishlashi talab etiladi. Bundan tashqari, FHDYo ma’lumotlar bazasidan bola to‘g‘risida aniq ma’lumotlar olish imkoni yaratilishi kerak. Shuningdek, arizachilar davlat xizmatlari markazlariga betinim qatnashlarining oldini olish uchun bog‘chaga navbatning holatini SMS-xabar jo‘natish orqali bilish imkoniyatiga ega bo‘lishlari lozim.
Bitta arizachi to‘rttagacha maktabgacha ta’lim muassasasiga navbatga turishiga sharoit yaratilishi ham muammoning anchayin tez hal etilishiga ko‘mak beradi. Bunda bittasi asosiy, qolganlari qo‘shimcha imkoniyat sifatida ko‘riladi.
Maktabgacha ta’lim muassasalariga yo‘llanma olish tartibini takomillashtirish orqali Davlat xizmatlari markaziga borish soni 6 tadan 2-3 taga qisqaradi, yo‘llanma olish bosqichlari kamayib, hujjatlarni to‘ldirish soddalashadi, avtomatlashtirish jarayoni mukammallashtiriladi, korrupsiya holatlarining oldi olinadi.
Izoh (0)