Инновацион ривожланиш вазирлиги ҳамда БМТ Тараққиёт дастури ҳамкорлигидаги Инновациялар ва бошқарув ечимлари лабораториясида мактабгача таълим муассасаларига қабул жараёнини мукаммаллаштириш бўйича тавсиялар муҳокама қилинди. Бу ҳақда «Дарё»га вазирлик матбуот хизмати маълум қилди.
Мазкур тавсиялар мактабгача таълим муассасаларига қабул жараёнини соддалаштиришга, коррупцияга имкон қолдирмасликка ҳамда фуқароларга қулайлик яратишга қаратилган.
Лойиҳа муаллифлари давлат мактабгача таълим муассасаларига қабул жараёнининг мавжуд ҳолатини таҳлил қилиб, бугунги кунда Давлат хизматлари марказлари орқали бўш жойга йўлланма олиш учун 16 та босқичдан ўтилиши аниқланди. Бу жараёнда электрон рақамли имзо сотиб олиш мажбурияти, бўш жойлар ҳақида маълумотларнинг ўз вақтида янгиланмаслиги ва ҳақиқатга мос эмаслиги, Ягона интерактив давлат хизматлари портали ва OpenEMIS ахборот тизими ўртасидаги тафовутнинг мавжудлиги аҳоли томонидан норозиликка сабаб бўлган. Бундан ташқари, аризачилар навбат келган-келмаганини билиш учун бир неча маротаба Давлат хизматлари марказига бориб-келишига тўғри келмоқда.
— Меъёрий-ҳуқуқий базадаги айрим камчиликлар бартараф этилмаса, муаммо ҳал бўлмайди, — дейди лойиҳа муаллифи Бунёд Ҳошимхўжаев. — Инсон омили, яъни туман мактабгача таълим бўлимлари масъул ходимларининг йўлланма беришдаги иштирокига буткул чек қўйиш керак. Боғчаларда АКТнинг қисман қўлланилиши, муассасага қабул қилинган ва у ердан кетган болалар ҳақидаги маълумотлар базасининг йўқлиги, ҳаракатларнинг мувофиқлаштирилмагани ҳам муаммолар келтириб чиқармоқда.
Лойиҳа муаллифлари томонидан болаларни мактабгача таълим муассасаларига жойлашни янада мукаммаллаштириш мақсадида электрон рақамли имзо олишни бекор қилиш таклиф этилмоқда. Шунингдек, мактабгача таълим муассасаларига қабул жараёнида имтиёзлардан фойдаланувчиларнинг турини камайтириш лозимлигига ҳам алоҳида урғу берилди. Бунда фақатгина ижтимоий ҳимоясиз аҳоли қатламларигагина бундай имтиёзларни сақлаб қолиш зарурлиги қайд этилди.
Тизимнинг мукаммал ишлаши учун фақат ташкилий жиҳатларга эмас, балки қабулга йўлланма бериш жараёнининг техник томонига ҳам алоҳида аҳамият қаратиш лозим. Бунда OpenEMIS тизими ва бу тизимни Ягона портал билан мувофиқлаштириш устида дастурчилар ишлаши талаб этилади. Бундан ташқари, ФҲДЁ маълумотлар базасидан бола тўғрисида аниқ маълумотлар олиш имкони яратилиши керак. Шунингдек, аризачилар давлат хизматлари марказларига бетиним қатнашларининг олдини олиш учун боғчага навбатнинг ҳолатини СМС-хабар жўнатиш орқали билиш имкониятига эга бўлишлари лозим.
Битта аризачи тўрттагача мактабгача таълим муассасасига навбатга туришига шароит яратилиши ҳам муаммонинг анчайин тез ҳал этилишига кўмак беради. Бунда биттаси асосий, қолганлари қўшимча имконият сифатида кўрилади.
Мактабгача таълим муассасаларига йўлланма олиш тартибини такомиллаштириш орқали Давлат хизматлари марказига бориш сони 6 тадан 2-3 тага қисқаради, йўлланма олиш босқичлари камайиб, ҳужжатларни тўлдириш соддалашади, автоматлаштириш жараёни мукаммаллаштирилади, коррупция ҳолатларининг олди олинади.
Изоҳ (0)