Andijon viloyat hokimligi ijtimoiy tarmoqlarda tarqalgan Xonobodda korxona-tashkilot xodimlari majburiy mehnatga jalb etilganiga oid hujjatlarni soxta ekanligini bildirib, bunday holatni rad etmoqda.
“Viloyat hokimligidagi har bir hujjat, joylarga ijro uchun yuborilishidan oldin, ro‘yxatga olinib, maxsus daftarga qayd etib boriladi. Biroq maqolada ko‘rsatib o‘tilgan “Xabarnoma” hokimlik tomonidan ro‘yxatga olinmagan va qayd etish daftarchasida mavjud emas. Aynan 4 avgust kuni Xonobod shahrida hech qanday yig‘ilish bo‘lib o‘tmagan, hech qanday hasharchilar kelib majburiy mehnatga jalb etilmagan”, — deyiladi raddiyada.
Viloyat hokimligiga ko‘ra, ayni vaqtda Xonobod shahrida 38 gektar maydonda bir vaqtning o‘zida 3 ming nafar mijozni qabul qilish imkoniyatiga ega bo‘lgan 1000 ta dala-hovli, ochiq va yopiq suv havzalari, milliy choyxona va zamonaviy restoranlar, sport maydonlari, umuman, dam olish uchun zarur bo‘lgan barcha sharoitlar ega turistik zonani barpo etish uchun qurilish va bunyodkorlik ishlari bilan birga hudud infratuzilmasini rivojlantirish maqsadida elektr energiyasi, ichimlik suvi, tabiiy gaz quvurlarini tortish va shaharchaning boshqa infratuzilmasini yaratish bo‘yicha ishlar amalga oshirilmoqda.
Hozirgi kunda Xontog‘ hududida qurilayotgan 2 sotixdan iborat dala-hovlilar Andijon viloyati hududidagi quruvchi tashkilotlar, tadbirkorlar va ishbilarmonlarga o‘z mablag‘lari evaziga, o‘zlari istagidagi loyihalar asosida qurish uchun Xonobod shahar hokimligi tomonidan ajratib berilgan. Shu bois mazkur qurilish ishlariga hech qanday korxona tashkilot va budjet tashkilotlari xodimlari jalb etilmagan.
“Yuqoridagilarga asosan bu kabi uydirma xabarlar Andijon viloyati hokimligi va hokimini obro‘sizlantirishga qaratilganini inobatga olib, viloyat hokimligi ushbu xabarni feyk va yolg‘on xabar deb qabul qilishilarini so‘raymiz. Andijon viloyati hokimligi Xonobod shahridagi qurilish ishlari bilan tanishish istagini bildirgan Respublikamizdagi barcha ommaviy axborot vositasi xodimlarini, internet jurnalistlari va blogerlargi Xonobod shahriga kelib qurilish jarayonlari bilan tanishishga taklif qiladi. Yaqin kunlarda viloyat hokimligi tomonidan Xonobodda olib borilayotgan bunyodkorlik ishlarini keng ommaga yoyish maqsadida Press-tur tashqil qilinishi ko‘zda tutilgan”, — deyiladi matnda.
Mutasaddilarning ishontirishicha, “Andijon viloyati hokimligi o‘z hududida har qanday majburiy mehnat alomatlariga yo‘l qo‘ymaydi va buni qat’iy nazorat ostiga olgan”.
Izoh (0)