Андижон вилоят ҳокимлиги ижтимоий тармоқларда тарқалган Хонободда корхона-ташкилот ходимлари мажбурий меҳнатга жалб этилганига оид ҳужжатларни сохта эканлигини билдириб, бундай ҳолатни рад этмоқда.
«Вилоят ҳокимлигидаги ҳар бир ҳужжат, жойларга ижро учун юборилишидан олдин, рўйхатга олиниб, махсус дафтарга қайд этиб борилади. Бироқ мақолада кўрсатиб ўтилган «Хабарнома» ҳокимлик томонидан рўйхатга олинмаган ва қайд этиш дафтарчасида мавжуд эмас. Айнан 4 август куни Хонобод шаҳрида ҳеч қандай йиғилиш бўлиб ўтмаган, ҳеч қандай ҳашарчилар келиб мажбурий меҳнатга жалб этилмаган», — дейилади раддияда.
Вилоят ҳокимлигига кўра, айни вақтда Хонобод шаҳрида 38 гектар майдонда бир вақтнинг ўзида 3 минг нафар мижозни қабул қилиш имкониятига эга бўлган 1000 та дала-ҳовли, очиқ ва ёпиқ сув ҳавзалари, миллий чойхона ва замонавий ресторанлар, спорт майдонлари, умуман, дам олиш учун зарур бўлган барча шароитлар эга туристик зонани барпо этиш учун қурилиш ва бунёдкорлик ишлари билан бирга ҳудуд инфратузилмасини ривожлантириш мақсадида электр энергияси, ичимлик суви, табиий газ қувурларини тортиш ва шаҳарчанинг бошқа инфратузилмасини яратиш бўйича ишлар амалга оширилмоқда.
Ҳозирги кунда Хонтоғ ҳудудида қурилаётган 2 сотихдан иборат дала-ҳовлилар Андижон вилояти ҳудудидаги қурувчи ташкилотлар, тадбиркорлар ва ишбилармонларга ўз маблағлари эвазига, ўзлари истагидаги лойиҳалар асосида қуриш учун Хонобод шаҳар ҳокимлиги томонидан ажратиб берилган. Шу боис мазкур қурилиш ишларига ҳеч қандай корхона ташкилот ва бюджет ташкилотлари ходимлари жалб этилмаган.
«Юқоридагиларга асосан бу каби уйдирма хабарлар Андижон вилояти ҳокимлиги ва ҳокимини обрўсизлантиришга қаратилганини инобатга олиб, вилоят ҳокимлиги ушбу хабарни фейк ва ёлғон хабар деб қабул қилишиларини сўраймиз. Андижон вилояти ҳокимлиги Хонобод шаҳридаги қурилиш ишлари билан танишиш истагини билдирган Республикамиздаги барча оммавий ахборот воситаси ходимларини, интернет журналистлари ва блогерларги Хонобод шаҳрига келиб қурилиш жараёнлари билан танишишга таклиф қилади. Яқин кунларда вилоят ҳокимлиги томонидан Хонободда олиб борилаётган бунёдкорлик ишларини кенг оммага ёйиш мақсадида Пресс-тур ташқил қилиниши кўзда тутилган», — дейилади матнда.
Мутасаддиларнинг ишонтиришича, «Андижон вилояти ҳокимлиги ўз ҳудудида ҳар қандай мажбурий меҳнат аломатларига йўл қўймайди ва буни қатъий назорат остига олган».
Изоҳ (0)