11—13-avgust kunlari Xiva shahridagi “Ichan qal’a” davlat muzey-qo‘riqxonasi hududida “Qovun sayli” o‘tkaziladi. Bu haqda O‘zbekiston Respublikasi Turizmni rivojlantirish davlat qo‘mitasi matbuot xizmati xabar qiladi.
Xorazm qovunchiligini keng targ‘ib qilish orqali mahalliy va xorijiy sayyohlarni e’tiborini qaratish va sayyohlar oqimini oshirish maqsadida o‘tkazilayotgan mazkur tadbir doirasida poliz (qovoq, tarvuz) va mevali bog‘ mahsulotlari (shaftoli, olma, uzum, nok va quruq mevalar) ko‘rgazmasi o‘tkaziladi.
Shuningdek, ko‘rgazma doirasida mahalliy folklor-etnografik guruhlar, yosh estrada xonandalarining chiqishlari, teatrlashtirilgan sahnalar va hunarmandchilik mahsulotlari namoyishi ham o‘tkaziladi.
“Xorazmning tilyorar qovun, tarvuzlari hamda shirin-shakar mevalari mazasini totib, haqiqiy bayram muhitiga tushishni istasangiz, 11—13-avgust kunlari “Ichan qal’a”ga tashrif buyuring va mazmunli hordiq chiqaring”,— deyilgan xabarda.
Izoh (0)