Namangan viloyatida bugungi kunda 816 ta maktabgacha ta’lim muassasasi faoliyat yuritib kelmoqda. Ularga 93 ming nafardan oshiq bola qamrab olingan bo‘lib, bu ko‘rsatkich yil boshidagi 36,2 foizdan 41,2 foizgacha ko‘tarildi. Bu haqda “Daryo” muxbiri xabar bermoqda.
Viloyat maktabgacha ta’lim boshqarmasi mutasaddilariga ko‘ra, ushbu muassasalarning 264 tasi nodavlat tashkiloti, xususan, 9 tasi davlat-xususiy sheriklik ko‘rinishida. Kuni kecha ularning safiga o‘ninchisi ham qo‘shildi.
Yangiqo‘rg‘on tumanidagi “Gaiston” mahallasida salkam 20 yildan beri qarovsiz yotgan bino butkul ta’mirlanib, ko‘rkam ko‘rinishga keltirildi. Buning uchun sohada 37 yil faoliyat yuritgan Svetlana To‘xtaboyeva 1,3 milliard so‘m kredit oldi, o‘zi 500 million so‘mga yaqin mablag‘ sarfladi.
— Ko‘rib turibsiz, 100 o‘rinli, barcha qulayliklarga ega bog‘chaga aylandi. Ochilganimizga hech qancha bo‘lganiga qaramay 57 nafar bolani qabul qilib bo‘ldik. Ayniqsa, kichik—yasli guruhlarimizga talab kuchli. Muassasamizda tarbiyalanuvchilar uchun rus va ingliz tillari o‘rgatiladi, musiqa, rasm va raqs to‘garaklari bo‘lishi ko‘zda tutilgan, — deydi “Sveta bolajon” MTM rahbari S.To‘xtaboyeva.
Tuman maktabgacha ta’lim bo‘limi mudiri E’zoza To‘raboyevaga ko‘ra, Yangiqo‘rg‘onda yil oxirigacha yana 2 ta davlat bog‘chasi, bitta davlat-xususiy sheriklik, 30 ta oilaviy bog‘cha ishga tushadi. Maktabgacha ta’lim muassasalariga bolalar qamrovi esa hozirgi 33 foizdan viloyat ko‘rsatkichi darajasiga yetadi.
Izoh (0)