Наманган вилоятида бугунги кунда 816 та мактабгача таълим муассасаси фаолият юритиб келмоқда. Уларга 93 минг нафардан ошиқ бола қамраб олинган бўлиб, бу кўрсаткич йил бошидаги 36,2 фоиздан 41,2 фоизгача кўтарилди. Бу ҳақда «Дарё» мухбири хабар бермоқда.
Вилоят мактабгача таълим бошқармаси мутасаддиларига кўра, ушбу муассасаларнинг 264 таси нодавлат ташкилоти, хусусан, 9 таси давлат-хусусий шериклик кўринишида. Куни кеча уларнинг сафига ўнинчиси ҳам қўшилди.
Янгиқўрғон туманидаги «Гаистон» маҳалласида салкам 20 йилдан бери қаровсиз ётган бино буткул таъмирланиб, кўркам кўринишга келтирилди. Бунинг учун соҳада 37 йил фаолият юритган Светлана Тўхтабоева 1,3 миллиард сўм кредит олди, ўзи 500 миллион сўмга яқин маблағ сарфлади.
— Кўриб турибсиз, 100 ўринли, барча қулайликларга эга боғчага айланди. Очилганимизга ҳеч қанча бўлганига қарамай 57 нафар болани қабул қилиб бўлдик. Айниқса, кичик—ясли гуруҳларимизга талаб кучли. Муассасамизда тарбияланувчилар учун рус ва инглиз тиллари ўргатилади, мусиқа, расм ва рақс тўгараклари бўлиши кўзда тутилган, — дейди «Света болажон» МТМ раҳбари С.Тўхтабоева.
Туман мактабгача таълим бўлими мудири Эъзоза Тўрабоевага кўра, Янгиқўрғонда йил охиригача яна 2 та давлат боғчаси, битта давлат-хусусий шериклик, 30 та оилавий боғча ишга тушади. Мактабгача таълим муассасаларига болалар қамрови эса ҳозирги 33 фоиздан вилоят кўрсаткичи даражасига етади.
Изоҳ (0)