Samarqand shahridagi 64-ixtisoslashtirilgan maktab-internati o‘quvchisi 2005-yilda tug‘ilgan A.T. 25-iyul kuni o‘z joniga qasd qilgan. Sirdaryo viloyati Guliston tumanida istiqomat qilgan A.T. internatga 2019-yilning yanvar oyida Sirdaryo viloyati Guliston tumani sudining mayda o‘g‘irlik, daydilik bo‘yicha qo‘yilgan aybi bilan keltirilgan.
Maktab ma’muriyatining “Daryo”ga ma’lum qilishicha, voqea sodir bo‘lgan kechasi tarbiyachilar Nizomiddin Shamanov, Feruz Boliyev hamda Ramz Ridvanov navbatchilik qilishgan. Maxsus maktab internatidagi kuzatuv kamerasida yozib olingan videotasvirda A.T. ota-onalar uchun ajratilgan xonaga juda tezlik bilan kirib ketganligi qayd etilgan.
Koridorni aylanib yurgan tarbiyachi oradan 5 daqiqa o‘tgandan so‘ng uni osilgan holda ko‘rib qolgan va sheriklarini yordamga chaqirib ipni yechib olishgan. Tezda mashinaga solib “tez yordam”ga olib kelinayotgan vaqtda yo‘lda jon bergan.
Maxsus maktab internati ma’muriyati taqdim etgan ma’lumotga ko‘ra, A.T. surunkali ravishda uydagilarini sog‘inayotganligini, ota-onasi uni ko‘rgani kelishmayotganligini aytib tushkun kayfiyatda yurgan. Bir-ikki marta o‘z joniga qasd qilishga sha’ma qilgan. U bilan internat ma’naviy-ma’rifiy ishlar bo‘yicha o‘rinbosari G‘aybullayev Fazliddin, psixolog Feruza Yarlaqabova, yoshlar Ittifoqi yetakchisi Bobur To‘rayev yakka suhbat olib borishgan.
O‘tkazilgan tadbirlarda doimo ishtirok etib, bir necha marotaba “Faxriy yorliq” bilan taqdirlangan. Bundan tashqari A.T. bilan suhbatlashish uchun viloyat moslashuv markazidan psixolog Dilrabo Davronova taklif etilgan. Direktor o‘rinbosari Fazliddin G‘aybullayev bolaning onasi bilan A.T.dagi o‘zgarishlar to‘g‘risida telefon orqali gaplashib, internatga kelishini so‘ragan. Lekin marhumning onasi rad javobini olgan.
Voqea sodir bo‘lgan kechasi Samarqand shahar prokuraturasi, Ichki ishlar bo‘limi tomonidan dastlabki surishtiruv ishlari olib borildi. Bundan tashqari viloyat Xalq ta’limi xodimlari ham vaziyatni o‘rganib chiqishdi deyiladi xabarda.
Hozirda shahar prokuraturasi tomonidan tergov-surishtiruv ishlari olib borilmoqda.
Izoh (0)