Prezident 2018-yil 16-17-fevral kunlari Buxoro viloyatiga tashrifi chog‘ida ulug‘ ajdodlar – Xoja Abdulxoliq G‘ijduvoniy, Xoja Orif ar Revgariy, Xoja Mahmud Anjir Fag‘naviy, Xoja Ali Romitaniy, Xoja Boboyi Samosiy, Sayyid Amir Kulol, Bahouddin Naqshband me’moriy majmualarini rekonstruksiya qilish, muqaddas qadamjolarni bir-biri bilan bog‘lovchi yangi sayyohlik yo‘nalishini ochish, hududda turizmni rivojlantirishga doir ko‘rsatma bergan. Bu haqda O‘zA xabar qiladi.
Mazkur vazifalar ijrosini ta’minlash doirasida hozir “Yetti Pir” majmuasiga kirgan har bir ziyoratgohda ta’mirlash, bunyodkorlik ishlari jadallik bilan olib borilmoqda. Hududlari to‘liq obodonlashtirilib, tahoratxona, masjid, muzey, diniy-ma’rifiy mavzulardagi kitoblar rastalari, choyxona, shuningdek, avtoturargohlar qurilmoqda.
Qadamjolarga tashrif buyuradigan ziyoratchilar uchun tegishli shart-sharoitni yaratish diqqat markazida turibdi. Shu o‘rinda ta’kidlash joizki, bu maskanlar hududlarida zamonaviy mehmonxonalar qurilishi loyihalari ham amalga oshirilmoqda. Masalan, Vobkent, Shofirkon, Kogon tumanlarida joylashgan muborak ziyoratgohlarda har biri 50-60 o‘rinli ana shunday sayyohlik infratuzilmasi foydalanishga topshirildi.
Kuni kecha esa Romitan tumanida joylashgan Xoja Ali Romitaniy qadamjosi yonida ham zamonaviy mehmonxona ish boshladi.
Shu munosabat bilan davlat tashkilotlari, keng jamoatchilik vakillari, ziyoratchilar ishtirokida tantanali tadbir bo‘lib o‘tdi.
Umumiy loyiha-smeta qiymati 5 milliard so‘mga teng, ikki qavatdan iborat, 40 o‘rinli bu obyekt tadbirkor Zafarbek Alimbekovning pudrat korxonasi tomonidan barpo etildi.
Betakror dizaynga ega mehmonxonada xorijiy va mahalliy sayyohlarga sifatli va zamonaviy xizmat ko‘rsatish uchun barcha sharoit yaratilgan. Chunonchi, unda 2-3 kishilik va oilaviy yashashga mo‘ljallangan xonalar bor.
Izoh (0)