Президент 2018 йил 16-17 февраль кунлари Бухоро вилоятига ташрифи чоғида улуғ аждодлар – Хожа Абдулхолиқ Ғиждувоний, Хожа Ориф ар Ревгарий, Хожа Маҳмуд Анжир Фағнавий, Хожа Али Ромитаний, Хожа Бобойи Самосий, Саййид Амир Кулол, Баҳоуддин Нақшбанд меъморий мажмуаларини реконструкция қилиш, муқаддас қадамжоларни бир-бири билан боғловчи янги сайёҳлик йўналишини очиш, ҳудудда туризмни ривожлантиришга доир кўрсатма берган. Бу ҳақда ЎзА хабар қилади.
Мазкур вазифалар ижросини таъминлаш доирасида ҳозир «Етти Пир» мажмуасига кирган ҳар бир зиёратгоҳда таъмирлаш, бунёдкорлик ишлари жадаллик билан олиб борилмоқда. Ҳудудлари тўлиқ ободонлаштирилиб, таҳоратхона, масжид, музей, диний-маърифий мавзулардаги китоблар расталари, чойхона, шунингдек, автотураргоҳлар қурилмоқда.
Қадамжоларга ташриф буюрадиган зиёратчилар учун тегишли шарт-шароитни яратиш диққат марказида турибди. Шу ўринда таъкидлаш жоизки, бу масканлар ҳудудларида замонавий меҳмонхоналар қурилиши лойиҳалари ҳам амалга оширилмоқда. Масалан, Вобкент, Шофиркон, Когон туманларида жойлашган муборак зиёратгоҳларда ҳар бири 50-60 ўринли ана шундай сайёҳлик инфратузилмаси фойдаланишга топширилди.
Куни кеча эса Ромитан туманида жойлашган Хожа Али Ромитаний қадамжоси ёнида ҳам замонавий меҳмонхона иш бошлади.
Шу муносабат билан давлат ташкилотлари, кенг жамоатчилик вакиллари, зиёратчилар иштирокида тантанали тадбир бўлиб ўтди.
Умумий лойиҳа-смета қиймати 5 миллиард сўмга тенг, икки қаватдан иборат, 40 ўринли бу объект тадбиркор Зафарбек Алимбековнинг пудрат корхонаси томонидан барпо этилди.
Бетакрор дизайнга эга меҳмонхонада хорижий ва маҳаллий сайёҳларга сифатли ва замонавий хизмат кўрсатиш учун барча шароит яратилган. Чунончи, унда 2-3 кишилик ва оилавий яшашга мўлжалланган хоналар бор.
Изоҳ (0)