Insoniyat tarixida birinchilardan bo‘lib Oy sirtiga qadam bosgan amerikalik astronavt Nil Armstrongning qarindoshlari uning o‘limidan so‘ng maxfiy shartnoma shartlariga ko‘ra, u davolangan kasalxonadan 6 million dollar oldi. Bu haqda The New York Times xabar berdi.
“TASS”ning yozishicha, bu haqda anonim jo‘natuvchi tomonidan pochta orqali yuborilgan materiallar guvohlik bermoqda. Jurnalistlar hujjatlarning haqiqiy ekanligini aniqlagan.
Armstrong 2012-yilning avgust oyi oxirlarida 82 yoshida vafot etgan. Shu oyning boshlarida shifokorlar uning yuragini operatsiya qilgan. U reabilitatsiyani Armerikaning Sinsinnati shahrida o‘tagan. Armstrongning qarindoshlari shifoxona xodimlarini uni tegishlicha parvarish qilmaganlikda ayblagan. Ular 2014-yilda bu haqda ommaga ma’lum qilishga tayyor ekanligini shifokorlarga bildirgan.
Natijada shifoxona vakillari va qarindoshlar huquqshunosi o‘rtasida kelishuv tuzilgan va bu ma’lumotlarni oshkor etmaslik uchun shifoxona taxminan 6 million dollar to‘lashga rozi bo‘lgan.
Xabarda aytilishicha, Armstrongning qarindoshlari va shifoxona vakillari mustaqil mutaxassislarga murojaat qilib, astronavtning davolanishi va parvarishini baholab berishni so‘ragan. Mutaxassislarning ayrimlari shifokor xatoga yo‘l qo‘ygani va bu astronavtda ichki qon quyilishiga olib kelganini aytgan.
Ta’kidlanishicha, yuqoridagi kelishuv sud tomonidan tasdiqlangan va tomonlar shartnoma haqidagi ma’lumotlarni oshkor etmaslikka kelishgan. Armstrongning rafiqasi esa nashrga bergan intervyusida bu kelishuvda ishtirok etmaganini aytgan.
Izoh (0)