Инсоният тарихида биринчилардан бўлиб Ой сиртига қадам босган америкалик астронавт Нил Армстронгнинг қариндошлари унинг ўлимидан сўнг махфий шартнома шартларига кўра, у даволанган касалхонадан 6 миллион доллар олди. Бу ҳақда The New York Times хабар берди.
«ТАСС»нинг ёзишича, бу ҳақда аноним жўнатувчи томонидан почта орқали юборилган материаллар гувоҳлик бермоқда. Журналистлар ҳужжатларнинг ҳақиқий эканлигини аниқлаган.
Армстронг 2012 йилнинг август ойи охирларида 82 ёшида вафот этган. Шу ойнинг бошларида шифокорлар унинг юрагини операция қилган. У реабилитацияни Армериканинг Цинциннати шаҳрида ўтаган. Армстронгнинг қариндошлари шифохона ходимларини уни тегишлича парвариш қилмаганликда айблаган. Улар 2014 йилда бу ҳақда оммага маълум қилишга тайёр эканлигини шифокорларга билдирган.
Натижада шифохона вакиллари ва қариндошлар ҳуқуқшуноси ўртасида келишув тузилган ва бу маълумотларни ошкор этмаслик учун шифохона тахминан 6 миллион доллар тўлашга рози бўлган.
Хабарда айтилишича, Армстронгнинг қариндошлари ва шифохона вакиллари мустақил мутахассисларга мурожаат қилиб, астронавтнинг даволаниши ва парваришини баҳолаб беришни сўраган. Мутахассисларнинг айримлари шифокор хатога йўл қўйгани ва бу астронавтда ички қон қуйилишига олиб келганини айтган.
Таъкидланишича, юқоридаги келишув суд томонидан тасдиқланган ва томонлар шартнома ҳақидаги маълумотларни ошкор этмасликка келишган. Армстронгнинг рафиқаси эса нашрга берган интервьюсида бу келишувда иштирок этмаганини айтган.
Изоҳ (0)