Avvalroq mahalliy aholi tomonidan yopib qo‘yilgan Qirg‘iziston va Tojikiston chegarasidagi ziddiyatli hududdagi avtomobil yo‘llari yana ochildi. “TASS”ning xabar berishicha, bu haqda Qirg‘iziston Davlat chegara xizmati ma’lum qilgan.
“2019-yilning 25-iyulidan boshlab Botken-Isfahon (Qirg‘iziston) va Isfara-Vorux (Tojikiston) avtotrassasi harakatlanish uchun ochildi”, — deyilgan xabarda. Shunga qaramay, DChX ma’lumotiga ko‘ra, u yerda joylashgan ikki mamlakatning chegara bo‘linmalari kuchaytirilgan tartibda ishlashda davom etmoqda.
Qirg‘izistonning Oqsoy qishlog‘i va Tojikistonning Vorux anklavi hududida Qirg‘iziston va Tojikiston aholisi o‘rtasida 22-iyul kechasi to‘qnashuv sodir bo‘lgan va qariyb bir sutka davom etgan. Bunga tomonlardan biri bahsli hududda flagshtok o‘rnatgani sabab bo‘lgan. To‘qnashuv vaqtida ishtirokchilar ov qurollari, tosh va tayoqlardan foydalangan.
Mojarolar oqibatida umumiy hisobda bir kishi o‘ldirilgan. 30 dan ortiq odam, shu jumladan chegarachilar va militsiya xodimlari ham yaralanish va jarohatlar olgan. Qirg‘iziston xavfsizlik maqsadida Oqsoydan viloyat markazi Botkenga 600 nafardan ortiq odamlarni, asosan, ayollar, bolalar va keksalarni olib ketishga majbur bo‘lgan.
Qayd etilishicha, yaqin kunlarda bu ikki davlat rahbarlari uchrashadi va bahsli hudud muammosini muhokama qiladi.
Izoh (0)