Ғиждувон туманидаги Кўкработ қишлоғи фуқароси, чўпон Қобил Пардаев қайнукаси Баҳриддин Хўжаевнинг Россияга кетганидан фойдаланиб, унинг қарамоғидаги ҳамқишлоғига тегишли қўй, эчкиларни 36 миллион 600 минг сўмга пуллаб юборган. Бу ҳақда Жиноят ишлари бўйича Ғиждувон туман суди судьяси Бобораҳим Очилов «Дарё»га маълум қилди.
Ғиждувон туманидаги «Пахтаобод» маҳалла фуқаролар йиғинида яшовчи Баҳриддин Хўжаев анча йиллардан буён чўл массивидаги далаларда одамларнинг 200–250 бошга яқин қўй, эчкиларини боқиб келган. Ўз дўстлари ва таниш-билишларининг қўй-қўзиларини боқиши эвазига ҳар бир бош учун ойида 10 000 сўмдан пул олишга келишган. Қўй-қўзиларни боқишда укаси Фарҳод Хўжаев ҳам ёрдамлашиб келган. Бироқ чўпончилик қилиб келаётган Баҳриддин турмуш тақозоси билан Россияга жўнаб кетишига тўғри келган. Қарамоғидаги ҳамқишлоқларига тегишли бўлган қўй-қўзиларни Кўкработ қишлоғида яшовчи чўпон поччаси Қобил Пардаевга ишониб, ҳар бирини хатлов қилиб топшириб кетган.
Қайнукасининг ишончига кириб, ўзгаларнинг қўй-қўзисини «хатлаб» олган Қобил Пардаев орадан кўп ўтмай, фирибгарлик йўлига ўтган. Маҳалладоши Оромжон Акрамовага тегишли ва ҳар бирининг баҳоси ўртача 1 000 000 сўм бўлган 35 бош ҳисори ва дурага қўйларни ҳамда ҳар бирининг баҳоси ўртача 400 000 сўм бўлган 4 бош эчкини сотиб, пулларни ўз манфаати йўлида сарфлаган.
Баҳриддин Россияга кетгач, укаси Фарҳод қўйлардан хабар олиш учун келган вақтда унга «Оромжон Акрамованинг қўйлари бошқа атарнинг қўйларига қўшилиб кетган» деб алдаб келган. Бир неча маротаба такрорланган бу ҳолат Фарҳодда шубҳа уйғотган. Аниқлик киритишга уринишлари зое кетган. Орадан анча вақт ўтгандан сўнг Фарҳод ва Баҳриддин Хўжаевларнинг онаси Мунаввара Отамуродова ҳамда Оромжон Акрамовалар Ғиждувон туман ИИБга ариза билан мурожаат этишга мажбур бўлган.
— Куёвимнинг ўзимизга яқинроқ ҳудуд — «Қуччи» чўл массивидан анча узоқда жойлашган «Шўркўл» ер майдонларига ўғилларим қарамоғидаги қўйларни боқишга олиб кетгани бизни ташвишга солган эди. «Куёвимиз-ку, чув туширмас», деган хаёлга борганимиз ҳам рост. Ўзи тирикчилигимизни бир нави қилиб, шуни ортидан судраб турган бўлсак. Шубҳаларимиз тўғри чиқди. На илож, куёвим устидан арз қилишга мажбур бўлдим. Ахир у атарда 250 бошга яқин бошқа ҳамқишлоқларимизга ҳам тегишли қўй-қўзилар бор, — деди судда сўз олган онахон Мунаввара Отамуродова.
Суд судланувчи, жабрланувчи ва гувоҳларнинг кўрсатмаларини эшитиб, иш бўйича тўпланган далилларни текширган. Тарафларнинг музокара нутқлари ва судланувчининг охирги сўзини тинглаган.
Қобил Пардаев ўзининг шахсий муаммоларини ҳал қилиш мақсадида фуқаролардан олган қарзларини тўлаш учун қўй-қўзиларни сотишга мажбур бўлганини судда тан олган. Жумладан, 35 бош қўй ва 4 бош эчкини сотиб юбориб, ҳозирги кунда 36 600 000 сўм етказилган зарардан 6 600 000 сўминигина қайтара олганини, 30 миллион сўмни ҳам қайтаришини билдирган.
Қобил Пардаев Ўзбекистон Республикаси ЖКнинг 168-моддаси 2-қисмининг «а» банди билан айбдор, деб топилган ва унга нисбатан Ўзбекистон Республикаси Жиноят Кодексининг 57-моддаси қўлланилган. 2 йилу 6 ой муддатга озодликдан маҳрум қилиш жазоси тайинланган.
Фуқаро Оромжон Акрамовага етказилган зарарнинг қопланмай қолинган 30 миллион сўмини ундириш белгиланган.
Изоҳ (0)