Elektr energiyasidan noqonuniy foydalangan tadbirkor ta’minotchi korxonaga 150 million so‘mdan ortiq zarar keltirdi. Bu haqda “Daryo”ga MIB Qashqadaryo viloyati boshqarmasi matbuot xizmati xabar bermoqda.
Ma’lum qilinishicha, MIB Qashqadaryo viloyati boshqarmasi tezkor xodimlari tomonidan 2019-yilning 30-iyun sanasida “Islom Muxtor hamkor” MChJga qarashli “Sharshara” restorani tegishli tartibda ko‘rikdan o‘tkazilgan. Ko‘rik jarayonida “CE 303” rusumli elektr energiyasi sarfini hisoblash uskunasiga 50–60 kVt quvvatli iste’mol qurilmalari o‘rnatilgan bo‘lsa-da, hisoblagich ko‘rsatkichi 2 soat davomida o‘zgarmaganli aniqlangan. Shundan so‘ng, elektr energiyasi sarfini hisoblash uskunasining soz yoki nosozligi, ichki mexanizmiga masofaviy boshqarish qurilmasi (pult) o‘rnatilgan yoki o‘rnatilmaganligini aniqlash maqsadida Byuro tezkor xodimlari tomonidan ta’minotchi korxona vakillari va iste’molchi ishtirokida dalolatnoma tuzilib, hisoblash uskunasi yechib olinadi.
Elektr energiyasi sarfini hisoblash uskunasini ishlab chiqaruvchisidan olingan tekshirish xulosasiga ko‘ra, elektr hisoblagichning elektron muhri qasddan buzilganligi, hisob sxemasi fazalariga qo‘shimcha qo‘lbola qurilma o‘rnatilganligi ma’lum bo‘ldi. Shunga asosan, “O‘zenergoinspeksiya” Qashqadaryo viloyati hududiy bo‘limi va “Qashqadaryo hududiy elektr tarmoqlari” AJlar tadbirkorning 150 million 522 ming 250 so‘m zarar yetkazganligi to‘g‘risida xulosa bergan.
Mazkur holat yuzasidan tergovga qadar surishtiruv harakatlari olib borilmoqda.
Izoh (0)