Navoiy viloyatining Zarafshon shahrida tarbiyachilarning majburiy mehnatga jalb etilgani haqidagi xabar o‘z tasdig‘ini topmadi. Bu haqda Maktabgacha ta’lim vazirligi matbuot xizmatiga asoslanib, “Gazeta.uz” xabar berdi.
Avvalroq, “Ozodlik” bir nechta maktabgacha ta’lim muassasalari xodimlari sport marafoniga taklif etilgani, biroq ular musobaqa o‘rniga “Yangi Zarafshon” mahalla fuqarolar yig‘ini hududini supurishga majburlangani haqida yozgan edi.
Tarbiyachilardan biri bog‘cha xodimlari muntazam ravishda hududni tozalashga jalb etilishini ma’lum qilgani ham yozilgan.
Maktabgacha ta’lim vazirligining ma’lumotiga ko‘ra, “Yangi Zarafshon” mahallasi shahar markazidan ikki kilometr uzoqlikda joylashgan.
Tumanda uchta 1,16 va 20-sonli maktabgacha ta’lim muassasalari faoliyat yuritadi.
Ushbu maktabgacha ta’lim muassasalari xodimlari so‘roq qilinganida ular 15-iyul kuni o‘z xizmat vazifalarini bajarganini ma’lum qilgan. O‘sha kuni haftaning dushanba kuni edi, bolalarni qarovsiz qoldirib bo‘lmasdi, deyiladi xabarda.
“Ozodlik”da e’lon qilingan materialda esa bog‘chada (raqami ko‘rsatilmagan) bir nafar tarbiyachi qolgani haqida yozilgan edi.
“1,16, 20-sonli maktabgacha ta’lim muassasalarida kuzatuv kameralari o‘rnatilgan bo‘lib, ulardagi yozuvlar o‘sha kuni tarbiyachilarning ish joyida ekanligini tasdiqlaydi”, — deyiladi xabarda.
Maktabgacha ta’lim vazirligi, shuningdek tizimda maktabgacha ta’lim bo‘limi mudiri yordamchisi lavozimi yo‘qligini ham ta’kidlagan. “Ozodlik”dagi maqolada shunday lavozim haqida gap ketgan.
Qo‘shimcha ravishda Zarafshon markazidan 40—50 kilometr uzoqlikda joylashgan maktabgacha ta’lim muassasalari xodimlari ham so‘roq qilingan.
“Muruntov” mahallasida joylashgan 4-sonli maktabgacha ta’lim muassasasi mudirasining so‘zlariga ko‘ra 19-iyul kuni unga xorijiy raqamdan qo‘ng‘iroq bo‘lgan va vaziyatni izohlashni so‘rashgan.
Xuddi shunday qo‘ng‘iroq 20-sonli maktabgacha ta’lim muassasasi mudirasiga ham bo‘lgan. Ikkala mudira ham 15-iyul kuni xodimlar majburiy mehnatga jalb etilmagani, ular o‘sha kuni ish joylarida bo‘lganini ta’kidlagan, deyiladi xabarda.
“Maqolada ishlatilgan suratlar ham haqiqiy emasligi aniqlandi. Zarafshonda tarbiyachilarning majburiy mehnatga jalb etilganini aks ettiruvchi suratlar topilmadi”, deyiladi xabarda.
Izoh (0)