25-iyul kuni Oliy Majlis Senati sud-huquq masalalari va korrupsiyaga qarshi kurashish qo‘mitasining majlisi bo‘lib o‘tdi. Unda Adliya vazirligining joriy yil birinchi yarim yilligida amalga oshirilishi belgilangan maqsadli vazifalarning ijro etilishi bo‘yicha hisoboti eshitildi, deb xabar berdi “Daryo” muxbiri Madina Nurman.
Hisobotdan so‘ng qonun chiqaruvchi palata vakillari vazirlik tizimidagi tashkilotlarning vakillaridan mavjud muammo hamda kamchiliklar borasidagi takliflar tinglandi. Ayni muloqot bahs-munozara va muhokamalar tarzida o‘tdi.
Jumladan, Davlat xizmatlarini joriy qilish va rivojlantirish boshqarmasi boshlig‘i Mahmud Abdijaliyev raqamlashtirish mavzusiga to‘xtalib o‘tdi:
“Bizdagi eng asosiy masala davlat xizmatlarini ko‘rsatishda inson omilini kamaytirish. Nafaqat FXDYO organlari, balki hamma davlat organlari ma’lumotlar bazalarini raqamlashtirishimiz lozim. Integratsiya qildik, davlat xizmatlariga zarur bo‘lgan 1,5 milliarddan ortiq ma’lumotlar raqamlashtirilmagan.
Masalan, birgina misol, IIVdan sudlanganlik to‘g‘risida ma’lumotlar raqamlashtirilgani tufayli bugungi kunda sudlangan-sudlanmaganlik haqidagi ma’lumot 5 daqiqada berilmoqda. Avvallari bu ma’lumotni olish uchun 15 kun, hatto 1 oylab vaqt ketar edi. Ayni damda 100 dan ortiq davlat xizmatlari ko‘rsatiladigan bo‘lsa, shulardan 58 tasi idoraning ma’lumotlar omborini hali raqamlashtirish kerak. Ayni masala bevosita mablag‘, shtat, arxivlashtirish muammolariga borib taqaladi.
Davlat xizmatlari 2 xil usulda ko‘rsatilishini inobatga olsak, markazimiz belgilangan bazadan kirib ma’lumotni darhol olib berishi kerak. Hozir esa baza o‘sha idoralarda raqamlashtirilmagani sababli ariza to‘ldiriladi, yuboriladi, kutiladi, muddat cho‘ziladi. Natijada murojaat etuvchilarning noroziligini keltirib chiqaradi. Qurilayotgan markazlarimizda ham vaqti kelib fuqarolarimiz kelib yurmasligi uchun, maksimal darajada elektronlashtirishga katta e’tibor qaratishimiz lozim bo‘ladi. Hozirda Yagona interaktiv davlat portali orqali xizmatlar joriy etish bir vaqtning o‘zida olib borilyapti. O‘tgan yili, masalan, ro‘yxatdan o‘tkazishni oladigan bo‘lsak, 90% qismi markazlardan, 10% qismi Yagona interaktiv davlat xizmatlari portali orqali bo‘lgan”.
Izoh (0)