IShID tarkibida snayperchi bo‘lgan qozog‘istonlik erkak Nyu-Yorkda sud qilinadi

Nyu-Yorkda IShIDga yordam ko‘rsatganlikda ayblanayotgan qozog‘istonlik Rustam Asainovga nisbatan jinoyat ishi ochildi, deb xabar beradi Forum Daily.

Qoralovchi tomon taqdim etgan hujjatlarga ko‘ra, 42 yoshli Asainov Bruklinda 1998-yildan 2013-yilgacha yashab kelgan va AQSh fuqaroligini olgan.

Asainov 2003-yilning 18-iyulida bankrotga uchraganini ma’lum qilgan. Joriy yilning 18-iyulida esa u Yaqin Sharqdan Nyu-Yorkka olib kelingan. Asainov bir qancha muddat Suriya demokratik kuchlarining asiri bo‘lgan.

Agarda Rustam Asainov aybdor deb topilsa, 20 yilgacha ozodlikdan mahrum etilishi mumkin. Prokuratura unga nisbatan yana qo‘shimcha ayblovlar e’lon qilinishi mumkinligini qayd etgan.

Detektiv Martinning so‘zlariga ko‘ra, Asainov 2013-yilning 24-dekabrida Nyu-York aeroportidan Istanbulga uchgan. Ikki kun Istanbuldagi mehmonxonada yashagan Asainov Suriya tomon yo‘l olgan va u yerda IShIDning eng yaxshi snayperchilaridan biriga aylangan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.