Kuni kecha, 23-iyulda Vengriya poytaxti Budapesht shahrida biologiya fanidan o‘tkazilgan 30-jahon olimpiadasida o‘zbekistonlik o‘quvchilar 3 ta bronza medalni qo‘lga kiritdi. Mazkur olimpiada o‘quvchilar o‘rtasida o‘tkaziladigan eng muhim nufuzli xalqaro tadbirlardan biridir. Joriy yil unda dunyoning 80 ga yaqin davlatidan 300 nafardan ortiq iqtidorli o‘quvchilar ishtirok etdi, bu haqda Sog‘liqni saqlash vazirligi jamoatchilik bilan aloqalar bo‘limi “Daryo”ga ma’lum qildi.
Jumladan, Toshkent pediatriya tibbiyot instituti qoshidagi akademik litseyi o‘quvchilari Saida Valijonova, Xosiyat Qudratova va Navoiy akademik litseyi o‘quvchisi Husayn Egamovlar ham mazkur olimpiadada ishtirok etib, bronza medal sovrindorlari bo‘ldi.
“Ta’lim muassasamiz o‘quvchi yoshlari 2008-yildan buyon kimyo fani bo‘yicha o‘tgan qator jahon va xalqaro olimpiadalarda munosib ishtirok etib, bugungacha ellikka yaqin oltin, kumush va bronza medallarni qo‘lga kiritdi. Bu galgi jahon olimpiadasida o‘quvchilarimiz biologiya fanidan ham sovrindorlar safidan joy olgani katta yutug‘imiz bo‘ldi”, — deydi Toshkent pediatriya tibbiyot instituti qoshidagi akademik litseyi direktori, tibbiyot fanlari doktori, professor Ortiqboy Ishonqulov.
Ma’lumki, bugungi kunda mamlakatimizda ta’lim tizimida jadal islohotlar olib borilmoqda. Bu jarayonda ta’lim sifati va samaradorligini oshirish, ilg‘or pedagogik va axborot texnologiyalardan ta’lim jarayonida oqilona foydalanish yuzasidan muhim chora-tadbirlar amalga oshirilmoqda. Bugungi kunda 300 nafardan ziyod o‘quvchilar tahsil olayotgan Toshkent pediatriya tibbiyot instituti qoshidagi akademik litseyi pedagogik jamoasi ham bu borada ta’lim tizimi oldida turgan vazifalarni izchillik bilan amalga oshirish, yoshlarga xalqaro andozalar darajasida ta’lim berishga alohida e’tibor qaratmoqda.
Ta’lim muassasasi professor-o‘qituvchilari bu jarayonda mamlakatimiz va xorijdagi yetakchi ilm-fan, ta’lim maskanlari bilan hamkorlik qilib kelmoqda. Buning natijasida xorijdagi va mamlakatimizdagi nufuzli ilm-fan muassasalarining olimlari va pedagoglar ta’lim jarayoniga jalb etilayapti. Dars va mashg‘ulotlarni o‘tishda poytaxtimizdagi va Rossiyadagi oliy o‘quv yurtlarining o‘quv-ilmiy bazalaridan samarali foydalanilayapti.Ma’lumotlarga ko‘ra, ayni kunlarda akademik litseyning yana bir guruh yoshlari Fransiya poytaxti Parijda kimyo fanidan o‘tayotgan xalqaro olimpiadada ishtirok etayapti. Demak, xorijdan yoshlarning zafarli odimlari haqida xushxabarlar kelishi davom etadi, degan umiddamiz.
Izoh (0)