Tez tibbiy yordam mashinalarining xizmat ko‘rsatish radiusi 5—20 kilometrdan 5—12 kilometrgacha qisqartirildi. Bu haqda 23-iyul kuni Sog‘liqni saqlash vazirligi mutasaddi xodimlari ishtirokida jurnalistlar bilan bo‘lib o‘tgan ochiq muloqotda ma’lum qilindi, deya xabar bermoqda “Daryo” muxbiri Musulmonbek Ibrohimov.
Anjumanda Sog‘liqni saqlash vazirligining Davolash-profilaktika yordamini tashkillashtirish Bosh boshqarmasi boshlig‘i Farrux Sharipov tez tibbiy yordam mashinalarining chaqiruv vaqti va xizmat ko‘rsatish radiusi qisqarganini aytib o‘tdi.
“Tibbiy xizmat ko‘rsatish sifatini yanada yaxshilash maqsadida 1283 ta tez tibbiy yordam mashinalari sotib olindi. Chaqiruv vaqti 20—30 minutdan 10—15 minutgacha, xizmat ko‘rsatish radiusi esa 5—20 kilometrdan 5—12 kilometrgacha qisqartirildi”, — deya ta’kidladi Farrux Sharipov.
Shuningdek, vazirlik vakili tez tibbiy yordam xizmatini moliyalashtirish ikki barobarga oshganini qo‘shimcha qilishicha.
“Tez tibbiy yordam xizmatini moliyalashtirish 2 barobar oshdi. Xususan, Pediatriya markaziga 3,2 million dollarlik, ftiziatriya va pulmonologiya sohasiga 2 million yevro, kardiologiya markazlariga esa 2,8 million yevro qiymatiga teng bo‘lgan mablag‘lar sarflanib, zamonaviy tibbiy asbob-uskunalar bilan jihozlandi. Viloyat ko‘p tarmoqli tibbiyot markazlariga 18,4 million yevro, viloyat ko‘p tarmoqli bolalar tibbiyot markazlariga 14,3 million yevro qiymatiga teng bo‘lgan mablag‘lar sarflanib, zamonaviy tibbiy asbob-uskunalar bilan jihozlandi”, — dedi boshqarma boshlig‘i.
Izoh (0)