Тез тиббий ёрдам машиналарининг хизмат кўрсатиш радиуси 5—20 километрдан 5—12 километргача қисқартирилди. Бу ҳақда 23 июль куни Соғлиқни сақлаш вазирлиги мутасадди ходимлари иштирокида журналистлар билан бўлиб ўтган очиқ мулоқотда маълум қилинди, дея хабар бермоқда «Дарё» мухбири Мусулмонбек Иброҳимов.
Анжуманда Соғлиқни сақлаш вазирлигининг Даволаш-профилактика ёрдамини ташкиллаштириш Бош бошқармаси бошлиғи Фаррух Шарипов тез тиббий ёрдам машиналарининг чақирув вақти ва хизмат кўрсатиш радиуси қисқарганини айтиб ўтди.
«Тиббий хизмат кўрсатиш сифатини янада яхшилаш мақсадида 1283 та тез тиббий ёрдам машиналари сотиб олинди. Чақирув вақти 20—30 минутдан 10—15 минутгача, хизмат кўрсатиш радиуси эса 5—20 километрдан 5—12 километргача қисқартирилди», — дея таъкидлади Фаррух Шарипов.
Шунингдек, вазирлик вакили тез тиббий ёрдам хизматини молиялаштириш икки баробарга ошганини қўшимча қилишича.
«Тез тиббий ёрдам хизматини молиялаштириш 2 баробар ошди. Хусусан, Педиатрия марказига 3,2 миллион долларлик, фтизиатрия ва пульмонология соҳасига 2 миллион евро, кардиология марказларига эса 2,8 миллион евро қийматига тенг бўлган маблағлар сарфланиб, замонавий тиббий асбоб-ускуналар билан жиҳозланди. Вилоят кўп тармоқли тиббиёт марказларига 18,4 миллион евро, вилоят кўп тармоқли болалар тиббиёт марказларига 14,3 миллион евро қийматига тенг бўлган маблағлар сарфланиб, замонавий тиббий асбоб-ускуналар билан жиҳозланди», — деди бошқарма бошлиғи.
Изоҳ (0)