Samarqand shahridagi 11-sonli maktabgacha ta’lim tashkiloti tarbiyalanuvchisi bilan bog‘liq hodisa yuzasidan viloyat maktabgacha ta’lim boshqarmasi o‘z munosabatini bildirdi. Bu haqda “Daryo” muxbiri Farhod Norbo‘tayev xabar bermoqda.
Samarqand shahridagi 11-sonli maktabgacha ta’lim tashkilotida tarbiyalanuvchi Hasanov Sanjar bilan 2019-yil 29-mart kuni ro‘y bergan baxtsiz hodisa yuzasidan Samarqand shahar prokuraturasi tomonidan tergovoldi tekshiruv harakatlari olib borildi.
Tergovoldi surishtiruviga Samarqand viloyati Bandlik bosh boshqarmasi Davlat mehnat-huquq inspektorlari jalb qilinib, holat o‘rganilganda, voyaga yetmagan Sanjar Hasanov baxtsiz hodisa oqibatida, ya’ni o‘ng qo‘lining jimjilog‘ini krovat qisib qolishi oqibatida tan jarohati olganligi aniqlangan.
Aniqlangan holat yuzasidan 11-sonli maktabgacha ta’lim tashkilotining tarbiyachisi L.Erdonova bilan tuzilgan mehnat shartnomasi bekor qilingan. Xo‘jalik mudiri Xomidjonova Nigora Hamdamovaga nisbatan ma’muriy javobgarlik masalasi ko‘rilgan.
Viloyat maktabgacha ta’lim boshqarmasi tomonidan bu kabi holatlar kelgusida takrorlanishini oldini olish maqsadida, tuman (shahar) maktabgacha ta’lim bo‘limlari va barcha maktabgacha ta’lim tashkilotlari rahbarlariga tegishli ko‘rsatma va topshiriqlar berildi.
“Men boshqarma boshlig‘i sifatida farzandimiz Sanjar Hasanovning ota-onasi va barcha ota-onalardan uzr so‘rayman. Bundan keyin shunga o‘xshagan salbiy holatlar ro‘y bermasligi uchun tizimdagi 14 mingga yaqin ishchi xodimlar o‘z vazifasini halol va tizimli tashkil etishi bo‘yicha chora-tadbirlar belgilab olindi. Shuningdek, tizimdagi rahbar va mas’ul xodimlarning e’tiborsizligi oqibatida yuqoridagi kabi holatlar ro‘y bersa ularga nisbatan qonunchilikda belgilangan tartibda qat’iy choralar ko‘rilishini ta’minlayman”, — deya ta’kidlagan Samarqand viloyat MTB boshlig‘i Shuhrat Rahmonov.
Izoh (0)