Самарқанд шаҳридаги 11-сонли мактабгача таълим ташкилоти тарбияланувчиси билан боғлиқ ҳодиса юзасидан вилоят мактабгача таълим бошқармаси ўз муносабатини билдирди. Бу ҳақда «Дарё» мухбири Фарҳод Норбўтаев хабар бермоқда.
Самарқанд шаҳридаги 11-сонли мактабгача таълим ташкилотида тарбияланувчи Ҳасанов Санжар билан 2019 йил 29 март куни рўй берган бахтсиз ҳодиса юзасидан Самарқанд шаҳар прокуратураси томонидан терговолди текширув ҳаракатлари олиб борилди.
Терговолди суриштирувига Самарқанд вилояти Бандлик бош бошқармаси Давлат меҳнат-ҳуқуқ инспекторлари жалб қилиниб, ҳолат ўрганилганда, вояга етмаган Санжар Ҳасанов бахтсиз ҳодиса, яъни ўнг қўлининг жимжилоғини кроват қисиб қолиши оқибатида тан жароҳати олганлиги аниқланган.
Аниқланган ҳолат юзасидан 11-сонли мактабгача таълим ташкилотининг тарбиячиси Л.Эрдонова билан тузилган меҳнат шартномаси бекор қилинган. Хўжалик мудири Хомиджонова Нигора Ҳамдамовага нисбатан маъмурий жавобгарлик масаласи кўрилган.
Вилоят мактабгача таълим бошқармаси томонидан бу каби ҳолатлар келгусида такрорланишини олдини олиш мақсадида, туман (шаҳар) мактабгача таълим бўлимлари ва барча мактабгача таълим ташкилотлари раҳбарларига тегишли кўрсатма ва топшириқлар берилди.
«Мен бошқарма бошлиғи сифатида фарзандимиз Санжар Ҳасановнинг ота-онаси ва барча ота-оналардан узр сўрайман. Бундан кейин шунга ўхшаган салбий ҳолатлар рўй бермаслиги учун тизимдаги 14 мингга яқин ишчи ходимлар ўз вазифасини ҳалол ва тизимли ташкил этиши бўйича чора-тадбирлар белгилаб олинди. Шунингдек, тизимдаги раҳбар ва масъул ходимларнинг эътиборсизлиги оқибатида юқоридаги каби ҳолатлар рўй берса уларга нисбатан қонунчиликда белгиланган тартибда қатъий чоралар кўрилишини таъминлайман», — дея таъкидлаган Самарқанд вилоят МТБ бошлиғи Шуҳрат Раҳмонов.
Изоҳ (0)