Veterinariya va chorvachilikni rivojlantirish davlat qo‘mitasi raisi o‘rinbosari Abror Akbarov OAVlarda tarqalgan, “Kolbasa aslida qanday tayyorlanishini bilsangiz, uni yemaysiz” degan gap unga tegishli emasligini ma’lum qildi. Uning O‘zA orqali e’lon qilingan bayonotini to‘lig‘icha keltirib o‘tamiz.
Joriy yil 19-iyul kuni Axborot va ommaviy kommunikatsiyalar agentligida Veterinariya va chorvachilikni rivojlantirish davlat qo‘mitasi mutasaddilari ishtirokida OAV xodimlari uchun ochiq muloqot tashkil etilgandi.
Muloqot chog‘ida OAV xodimlarini qo‘mita tomonidan amalga oshirilayotgan ishlar bilan tanishtirish barobarida jurnalistlarni qiziqtirgan ko‘plab savollarga ham javob qaytarildi.
Xususan, go‘sht narxining oshishi, kolbasalar va umumiy ovqatlanish joylaridagi muammolarga mutaxassislar munosabat bildirishdi.
Savollar ichida “go‘sht qimmatlashgan bir vaqtda nima uchun kolbasa mahsulotlari arzon” qabilidagi savolga to‘xtalib, kolbasa tayyorlash texnologiyasi haqida tushunchalar berildi va noqonuniy sexlar haqida fikr yuritildi.
Ma’lumki, kolbasa qayta ishlanib tayyorlanadigan mahsulot yoki oddiyroq qilib aytsak, go‘shtni qayta ishlash natijasida tayyorlanadigan “taom”. Uni tayyorlashning o‘z standartlari va texnologiyasi mavjud. Bugun yurtimizda qator salohiyatli kolbasa ishlab chiqaruvchilar faoliyat yuritadi va ko‘pchiligi bilan mahsulotlarini eksportga yo‘naltirish bo‘yicha ishlar olib borilmoqda.
Bir narsani to‘g‘ri tushunishimiz kerak, kimdir go‘sht yemaydigan – vegetarian bo‘lsa, kimdir oshning sabzisini yoki boshqasi non yemaydi. Ochig‘i, men ham oilam bilan sevib iste’mol qiladigan kolbasa mahsulotlari bor. Bu – hammaning shaxsiy tanlovi.
Ta’kidlash kerak, kolbasaning qanday tayyorlanishini ko‘rsangiz, uni yemaysiz degan fikr mutaxassisga xos emas. Shu ma’noda qalamkashlardan kolbasa va uning tayyorlanishi borasidagi munosabatlarimni to‘g‘ri talqin qilishlarini alohida ta’kidlayman.
Shuningdek, bozordagi go‘sht narxini monitoring qilish va uning sabablarini o‘rganish qo‘mita vakolatiga kirmasligi to‘g‘risidagi fikrlarimni ham to‘g‘ri talqin qilishlarini so‘rardim.
Bu borada shunday sarlavha bilan mening nomimdan chiqarilgan ma’lumotlarni to‘g‘rilash bo‘yicha axborot tarqatuvchilarga murojaat qilganimizda ko‘pchiligi bizni to‘g‘ri tushundi. Biroq sarlavhasi saqlanib qoldi. Natijada turli saytlarda turlicha talqindagi fikr mazmuni namoyon bo‘ldi.
Shu o‘rinda jurnalistlarga axborot yetkazishda voqea-hodisani to‘g‘ri talqin qilish, gap ma’nosini buzmasdan, professional jurnalistik etika bilan yetkazishlarini so‘rardim.
Biz noqonuniy faoliyat yuritayotgan shaxslar faoliyatini har doim qoralaymiz va ularni bartaraf etish bo‘yicha qonunda belgilangan tartibda vakolat doirasida tegishli choralarni ko‘rib boramiz.
Bu borada biz OAV xodimlariga suyanamiz va Sizlar bilan doimiy hamkorlik qilishga tayyormiz.
Izoh (0)