Toshkent viloyatida Prezident Administratsiyasi mas’ullari ishtirokida sayyor qabul o‘tkazildi. Bu haqda Prezident xalq qabulxonasi matbuot xizmati xabar berdi.
Unda Oliy sud, Bosh prokuratura, Ichki ishlar vazirligi mas’ul xodimlari, Toshkent viloyatidagi sektorlar rahbarlari, viloyatdagi barcha boshqarma va tashkilot mutasaddilari murojaatchilarning ariza, shikoyat va takliflarini ko‘rib chiqqan.
Sayyor qabul yakunida jami kelib tushgan 300 dan ziyod murojaatning 64 tasi joyida hal etilgan, qo‘shimcha o‘rganish talab etiladigan 189 ta murojaatning ko‘rib chiqilishi nazoratga olingan, 51 ta murojaat bo‘yicha huquqiy maslahat va tushuntirishlar berilgan.
Xususan, ohangaronlik Nargiza Sulaymonova o‘zi yashayotgan “Taraqqiyot” mahallasi yo‘llari ta’mirtalabligidan shikoyat qilgan. Aytilishicha, o‘tgan yili bu ishlar boshlanib, so‘ng chala qolgan. Hudud aholisi shu ishlarga ko‘maklashish uchun 2018-yili 170 ming so‘mdan pul yig‘ib bergan, bu yil ham yo‘l ta’miri aholi majburiyatiga tushgan. Murojaatdan so‘ng ayni hududning yo‘llari homiy tomonidan ta’mirlanadigan bo‘lgan.
Olmaliq shahrida ijarada yashaydigan Xurshida Rustamova 2-guruh nogironi bo‘lgan 1992-yilda tug‘ilgan o‘g‘lini davolatishga yordam so‘ragan. Uning muammosi shu yerning o‘zida o‘rganilib, hal qilingan.
Izoh (0)