Ветеринария ва чорвачиликни ривожлантириш давлат қўмитаси раиси ўринбосари Аброр Акбаров ОАВларда тарқалган, «Колбаса аслида қандай тайёрланишини билсангиз, уни емайсиз» деган гап унга тегишли эмаслигини маълум қилди. Унинг ЎзА орқали эълон қилинган баёнотини тўлиғича келтириб ўтамиз.
Жорий йил 19 июль куни Ахборот ва оммавий коммуникациялар агентлигида Ветеринария ва чорвачиликни ривожлантириш давлат қўмитаси мутасаддилари иштирокида ОАВ ходимлари учун очиқ мулоқот ташкил этилганди.
Мулоқот чоғида ОАВ ходимларини қўмита томонидан амалга оширилаётган ишлар билан таништириш баробарида журналистларни қизиқтирган кўплаб саволларга ҳам жавоб қайтарилди.
Хусусан, гўшт нархининг ошиши, колбасалар ва умумий овқатланиш жойларидаги муаммоларга мутахассислар муносабат билдиришди.
Саволлар ичида «гўшт қимматлашган бир вақтда нима учун колбаса маҳсулотлари арзон» қабилидаги саволга тўхталиб, колбаса тайёрлаш технологияси ҳақида тушунчалар берилди ва ноқонуний цехлар ҳақида фикр юритилди.
Маълумки, колбаса қайта ишланиб тайёрланадиган маҳсулот ёки оддийроқ қилиб айцак, гўштни қайта ишлаш натижасида тайёрланадиган «таом». Уни тайёрлашнинг ўз стандартлари ва технологияси мавжуд. Бугун юртимизда қатор салоҳиятли колбаса ишлаб чиқарувчилар фаолият юритади ва кўпчилиги билан маҳсулотларини экспортга йўналтириш бўйича ишлар олиб борилмоқда.
Бир нарсани тўғри тушунишимиз керак, кимдир гўшт емайдиган – вегетариан бўлса, кимдир ошнинг сабзисини ёки бошқаси нон емайди. Очиғи, мен ҳам оилам билан севиб истеъмол қиладиган колбаса маҳсулотлари бор. Бу – ҳамманинг шахсий танлови.
Таъкидлаш керак, колбасанинг қандай тайёрланишини кўрсангиз, уни емайсиз деган фикр мутахассисга хос эмас. Шу маънода қаламкашлардан колбаса ва унинг тайёрланиши борасидаги муносабатларимни тўғри талқин қилишларини алоҳида таъкидлайман.
Шунингдек, бозордаги гўшт нархини мониторинг қилиш ва унинг сабабларини ўрганиш қўмита ваколатига кирмаслиги тўғрисидаги фикрларимни ҳам тўғри талқин қилишларини сўрардим.
Бу борада шундай сарлавҳа билан менинг номимдан чиқарилган маълумотларни тўғрилаш бўйича ахборот тарқатувчиларга мурожаат қилганимизда кўпчилиги бизни тўғри тушунди. Бироқ сарлавҳаси сақланиб қолди. Натижада турли сайтларда турлича талқиндаги фикр мазмуни намоён бўлди.
Шу ўринда журналистларга ахборот етказишда воқеа-ҳодисани тўғри талқин қилиш, гап маъносини бузмасдан, профессионал журналистик этика билан етказишларини сўрардим.
Биз ноқонуний фаолият юритаётган шахслар фаолиятини ҳар доим қоралаймиз ва уларни бартараф этиш бўйича қонунда белгиланган тартибда ваколат доирасида тегишли чораларни кўриб борамиз.
Бу борада биз ОАВ ходимларига суянамиз ва Сизлар билан доимий ҳамкорлик қилишга тайёрмиз.
Изоҳ (0)