O‘zbekistonda xufyona iqtisodiyot darajasi taxminan 45—46 foizni tashkil etmoqda. Bu haqda 22-iyul kuni Iqtisodiyot va sanoat vaziri jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Muloqot jarayonida Iqtisodiyot va sanoat vaziri Botir Xo‘jayev hozirgi vaqtda O‘zbekistonda xufyona iqtisodiyot darajasi bir muncha baland ko‘rsatkichni qayd etishini ma’lum qildi.
“Tadqiqotlarimiz natijasiga ko‘ra, bugungi kunda O‘zbekistonning xufyona iqtisodiyot darajasi taxminan 45—46 foizni tashkil etmoqda. Xufyona iqtisodiyot rivojlangan mamlakatlarda ham bor. Lekin uning iqtisodiyotdagi ulushi qanchaligiga qarab baholanadi. Bizning iqtisodiyotimizda bu daraja bir muncha baland”, — dedi vazir Botir Xo‘jayev.
Uning qo‘shimcha qilishicha, xufyona iqtisodiyotdan chiqishda valyuta siyosatini liberallashtirish va daromad solig‘idagi o‘zgarishlar sezilarli harakat bo‘lgan.
“2017-yilning 5-sentabridan boshlab valyuta ayriboshlashda bitta kursga o‘tish qabul qilingandi. Bu xufyona iqtisodiyotdan chiqishdagi eng asosiy qadam bo‘lgan. Shuningdek, jismoniy shaxslardan olinadigan daromad solig‘ini 12 foizga pasaytirish ham xufyona iqtisodiyotdan chiqishning bir yo‘liki, bu aholi o‘zining daromadini ochiq ko‘rsatishiga olib keladi”, — deya ta’kidladi vazir.
Izoh (0)