Zaha uchun 80 mln funt? Yo‘q, bo‘lmaydi. “Arsenal”ga kerak bo‘lgan transfer haqida

“Arsenal” uchun yozgi transferlar oynasi oson o‘tayotgani yo‘q.

Londonliklar Yevropa Chempionlar Ligasi yo‘llanmasidan quruq qolgani sabab, transferlar uchun ham ortiqcha mablag‘ haqida gapirmasa ham bo‘ladi. Futbolchilar ham “Emireyts”ga ko‘chib o‘tish ishtiyoqida yonayotgani yo‘q. O‘tgan mavsum “Arsenal” uchun so‘nggi 20 yil ichidada ilk bor Arsen Vengersiz o‘tdi. O‘tish davri murakkab, biroq talafotlarsiz kechdi hisob: Unai Emeri “to‘pchilar”ni Yevropa Ligasi finaliga qadar yetaklab bordi. Shuningdek, Angliya Premyer ligasida jamoa 6-o‘rinni egalladi.

Yozgi transferlarni oynasini ham klub uchun omadli o‘tmoqda, deb bo‘lmaydi. Unai Emeri klub iloji boricha tezroq Uilfrid Zahani o‘z safiga qo‘shib olishini so‘ramoqda. Biroq “Kristal Pelas” “Manchester Yunayted”ning sobiq o‘yinchisiga shu qadar katta narx belgilaganki, bu narx hatto grand klublarni ham o‘ylantirib qo‘yishga majbur qilgan. “Pelas” “kanonirlar”ning 40 million funtlik taklifiga allaqachon rad javobini berishga ulgurdi. “Burgutlar” Zahani 80 million funtdan kamiga sotmoqchi emas. Bu narxni eshitgandan so‘ng klub boshqa variantlar haqida o‘ylab ko‘rishga majbur bo‘lmoqda.

Sportskeeda kolumnisti Ben Uilfrid esa “Arsenal” uchun maqbul variantlarni taklif etishga harakat qilib ko‘rdi. Quyida ularni birgalikda ko‘rib chiqamiz.

Lukas Vaskes  (“Real”)

Yoz haqida gap ketar ekan, “Real” uchun fasl haqiqatan ham yorqin o‘tmoqda. Zidan allaqachon klub boshqaruvida. Florentino Peres esa klubni kuchaytirish uchun allaqachon 250 million funtdan ortiq mablag‘ sarflab qo‘ydi. Jamoaga Eden Azar, Luka Yovich, Rodrigo Leo, Ferlan Mendi kabi o‘yinchilar kelib qo‘shildi. Uzunquloq gaplarga ko‘ra, bu hali hammasi emas: transfer oynasi yopilgunga qadar Pol Pogba ham Zidanning shogirdlari qatoridan o‘rin olishi mumkin.

Katta loyihalarni amalga oshirishga chog‘langan ba’zi bir o‘yinchilarini xalos bo‘lishni istashi tabiiy. Shunday o‘yinchilardan bir ko‘pincha zaxiradan maydonga tushadigan — Lukas Vaskes. O‘tgan mavsum Lukas La Liganing atigi 15 ta o‘yinida maydonga tushdi. Hozir esa uning asosiy maqsadi yetarlicha o‘yin amaliyotini taqdim eta oladigan klubni topish va unga ko‘chib o‘tishdan iborat. Vaskesning “Arsenal”ga o‘tishi mumkinligi haqidagi gap-so‘zlar esa kecha paydo bo‘lgani yo‘q. Uning transferi 30 million funtga baholanmoqda.

Malkom (“Barselona”)

Malkom — o‘tgan mavsum uzoq davom etgan “transfer seriali”dan so‘ng, katta mojarolar evaziga “Barselona”ga o‘tgandi. Futbolchi avvaliga “Roma”ga rozilik berib, so‘nggi soniyalarda “Barselona” taklifini qabul qilib, rimliklarning g‘azabini qo‘zg‘agandi. Ammo futbolchining shuncha mojarolar evaziga “Barselona”ga o‘tgani, o‘zini oqlamadi hisob. Boisi futbolchi Kataloniya klubida asosiy tarkib o‘yinchisi bo‘lish tugul, zaxiradan ham muqim o‘rin egallay olmadi. Buni Malkomning La Ligadagi statistikasi ham ko‘rsatib turibdi — atigi 6 ta o‘yin. Grizmanning klubga kelishi va Neymarning qaytish ehtimoli esa Malkomning shundoq ham kichikkina imkoniyatlarni parcha-parcha qilib yubordi. “Barselona” ham tezroq Malkomni sotib yuborishni xohlamoqda. “Arsenal”ga esa aynan braziliyalik iqtidorda bo‘lgani kabi kuchli va nozik texnika sohibi kerak. To‘g‘ri, u ortda qolgan mavsum o‘yin amaliyotisiz qoldi, biroq bu uning iqtidorini yo‘qota olmaydi. Malkoming transferi 36 million funt atrofida baholanmoqda.

Rayan Freyzer (“Bornmut”)

Balki, “Arsenal” Angliya Premyer ligasi o‘ynash tajribasiga o‘yinchi kerakdir? Agar Zaha kelmaydigan bo‘lsa, Rayan Freyzer-chi? “Bornmut” futbolchisi o‘tgan mavsumni a’lo darajada o‘tkazdi. Rayan 2018/19-yilgi mavsum APLda 7 ta gol urib, 14 ta golli uzatmani amalga oshirdi. Assistentlikda u faqatgina endilikda “Real” a’zosi hisoblangan Eden Azardan ortda qoldi — 15 ta golli uzatma. Freyzer ham yuqoriroq ko‘tarilishi kerakligini tushunib turibdi. Rayanning transferi — albatta, katta tavakkal bo‘ladi. Boisi biz uning yangi jamoada, boshqa saviyali futbolchilar bilan qanday o‘yin ko‘rsatishini bilmaymiz. APLdagi tajribasiga qaramay, Freyzerga yangi jamoasiga ko‘nikish uchun vaqt talab etiladi. Ha, uning transferi katta tavakkal, biroq Rayan Zahadan anchagina arzon turadi. Uning transferi 27 million funtga baholanmoqda.

Yannik Ferreyra Karrasko (“Dalyan Ifan”)

So‘nggi yillarda Yevropaing ko‘plab kuchli futbolchilari Osiyoga, xususan, Xitoy klublariga yo‘l olmoqda. Gap Yevropada qilarini qilib bo‘lgan veteran o‘yinchilar haqida emas, balki “eng gullagan yoshlik chog‘ida” Chin o‘lkasi tomon otlangan — Yannik Karrasko haqida. 2016-yilgi Yevropa Chempionlar Ligasi finalida “Real” darvozasini ishg‘ol qilgan belgiyalik yarim himoyachi ayni damda Xitoyning “Dalyan Ifan” klubida to‘p tepib yuribdi. U “Atletiko Madrid”da o‘z o‘rniga ega bo‘lgan futbolchi barchasiga ko‘z yumib, Xitoyga ketganiga ham 18 oydan oshdi. Futbolchi Xitoydan beziganini ochiq-oydin namoyish etmoqda. “Dalyan” Karraskoni mojaralar sabab ma’lum muddatga o‘yinlardan ham chetlatdi. Bo‘layotgan ishlar esa futbolchining Yevropaga qaytishni xohlayotganidan darak bermoqda. “Arsenal” esa uning uchun hozirda ideal variantlardan biri. Belgiyalikning transferi 18 million funtga baholanmoqda.

Yosin Braimi (erkin agent)

Agar asosiy maqsad pulni iqtisod qilish bo‘ladigan bo‘lsa, u holda Yosin Braimidan yaxshiroq variant topilishi mushkul. Braimi “Arsenal”ga tekinga tushadi. Boisi futbolchining “Portu” bilan shartnomasi yakuniga yetdi va u erkin agentga aylandi. U o‘tgan mavsum o‘zi uchun rekord bo‘lgan ko‘rsatkichni qayd etdi — 13 ta gol. To‘g‘ri, uning yoshi 29 da, biroq “kanonirlar”ga darhol natija bera oladigan futbolchi kerak. Braimi esa buning uchun ideal variant. Tejalgan mablag‘ evaziga esa boshqa pozitsiyalarni kuchaytirish haqida o‘ylash mumkin.