Toshkent viloyati hududida bir kunlik “Diqqat piyoda!” profilaktik tadbiri o‘tkazildi. Bu haqda viloyat hokimligi matbuot xizmati xabar berdi.
Tadbirda asosiy e’tibor qoidabuzar piyodalarga qaratildi. Kun davomida Toshkent viloyati YPX inspektorlari tomonidan piyodalarga nisbatan 531 ta ma’muriy bayonnoma rasmiylashtirilib, O‘zbekiston Respublikasi Ma’muriy javobgarlik to‘g‘risidagi kodeksining 138-moddasiga ko‘ra, 531 fuqaroga nisbatan 35 million 883 ming 210 so‘m jarimalar belgilandi.
Viloyat hududidagi tuman, shaharlar kesimida tahlil qilinganda, eng ko‘p qoidabuzar piyodalar Bekobod tumani (51 ta), Nurafshon shahri (48 ta), Chirchiq shahri (39 ta), Bo‘stonliq tumani (32 ta) va Angren shahri (28 ta) ga to‘g‘ri keldi.
Ta’kidlash kerakki, Toshkent viloyatida yuz bergan yo‘l-transport hodisalari (YTH) kompleks tahlil qilinganda, har ikki yo‘l-transport hodisalarining biri piyodani urib yuborish holatiga to‘g‘ri kelmoqda. Joriy yilning o‘tgan davri mobaynida piyodalar ishtirokida 213 ta YTH sodir bo‘lgan. Qariyb 50 foiz holatda aynan piyodaning yo‘l harakati qoidalariga amal qilmasligi oqibatida sodir bo‘lganligi, 34 ta yo‘l-transport hodisasida piyoda mast holatda bo‘lganligi ma’lum bo‘lgan.
Izoh (0)