Qashqadaryo viloyatining Nishon tumanidagi “Otquduq” massivida 2015–2016-yillarda qad rostlagan 37 ta namunali xonadon egalarining “Daryo”ga murojaat qilishicha, zamonaviy talablar asosida qurib bitkazilgan uy-joylarida yashash uchun sharoit yo‘q. Na gaz va na suvdan darak bor. Aholi tuman hokimligi ushbu muammodan yaxshigina xabardor bo‘lsa-da, hudud aholisiga o‘gaydek munosabatda bo‘lib, muammoga panja orasidan qarayotganidan shikoyat qilmoqda.
“Daryo” muxbiri aholi murojaatini o‘rganish maqsadida Nishon tumanida bo‘ldi.
— Namunali uy-joylardan olamiz, — deb orzu qilib, yelib-yugurib yetishganimiz cho‘l o‘rtasida qad rostlagan na suvi va na gazidan darak bor bir maskan bo‘ldi, — deydi ushbu hududda yashovchi aholi vakillaridan biri Qudrat Mamarasulov. – Qarshi tumanining “Mirmiron” hududida qurib bitkazilgan namunali uy-joylarni ko‘rib, havas qilgandik. O‘shanday uy-joylarga erishamiz deb o‘ylagandik. Ammo o‘ylaganlarimiz sarob bo‘lib chiqyapti. Shahar tipida namunali deya qurilgan uylarda na suv bor va na gaz.
— Suv va gaz yo‘qligi haqida tuman hokimligiga bir necha marotaba murojaat qildik, — deydi Nodira Kamolova. – Ammo foydasi yo‘q. Hech kim bizni eshitmayapti. Hatto eshitishni ham xohlamayapti. So‘nggi kunlarda tuman hokimligiga bu xususida bildirish uchun borsak, kiritishmayapti ham. Suv yo‘qligidan har yili ekayotgan daraxtlarimiz qurib bitmoqda. Biz ichimlik suvini sotib olib bo‘lsa-da, ichishga tayyormiz, hech bo‘lmaganda artezian suv chiqarib berish imkoniyatini qilishsin, degan o‘tinchimiz bor. Dodimizni kimga aytishni bilmay, boshimiz qotgan.
Aholi vakillaridan biri Faxriddin Sattorovning qo‘shimcha qilishicha, ushbu hududdan 100–150 metr narida “Sho‘rtangazkimyo” majmuasi uchun 1000 lik hajmdagi trubada suv olib o‘tilgan. Aholi ushbu suvdan umidvor ekanligini bildirmoqda.
— Yashayotgan joyimizda bolalar uchun na o‘yingoh bor va na biror bir sport majmuasi, — deydi Mahbuba Rahmatova. – Farzandlarimiz “o‘ynayman”, deb ko‘chaga chiqsa, tuproqqa bulg‘anib kiradi. Zavodga yuk olib o‘tayotgan yuk mashinalarining shovqini, harakat payti chang ko‘tarishidan aziyat chekyapmiz. Eng yomoni yuk mashina haydovchilari o‘zaro poyga qo‘yishib, uyimizni chang-to‘zonga to‘ldirishadi.
Aholi namunali uy-joylar shahar narxida, balki undan ham qimmat narxga pullangani, ammo shunday bo‘lsa-da, yetarli darajadagi sharoitlar bilan ta’minlab berilmaganidan shikoyat qilmoqda.
Sobiq “Otquduq”, ayni damda “Yangiobod” deya nom berilgan “Navbahor” mahallasiga qarashli hududda yashovchi Dilorom Boymurodovaning aytishicha, ushbu hududdan qurilgan uy-joylar uchun vaqtida viloyat markazidagi uy-joylar narxidan ham 5 million so‘m ko‘p pul olingan. Sababiga kelganda, qurilish materiallarini olib kelish xarajatlari uchun degan javobni berishgan.
— O‘sha paytda shaharda qurilgan namunali uy-joylardan ham 5 million so‘m ortiqcha to‘laganimizga ham rozimiz, ammo yashash uchun sharoit yo‘qligi bizni tashvishlantirayapti, — deydi Dilorom Boymurodova. – Nega endi uyga shahar narxida, kerak bo‘lsa undan ortiq pul to‘lab suv va gazsiz yashashimiz kerak?
Ma’lum bo‘lishicha, Nuriston shaharchasidan 5 kilometr narida joylashgan “Otquduq” massivida 2015-yil 30 ta, 2016-yil esa 7 ta namunali turar-joylar “Sho‘rtangazkimyo” majmuasi ishchi xodimlari uchun qurib bitkazilgan. Dastlabki badal to‘lovi 50 million so‘mdan 60 million so‘mgacha bo‘lgan umumiy narxi 175–185 million so‘m qilib baholangan mazkur turar-joy majmualari allaqachon foydalanishga topshirilgan bo‘lsa-da, ayni kunga qadar ushbu uylarga gaz ham, suv ham keltirilmagan.
— Eng yomoni 2016-yil biz uchun qurilishi boshlangan 7 ta uy-joy yakuniga yetmay, o‘sha paytda ham ancha muammo bo‘lgandi, — deydi Dilorom Boymurodova. – Qurilish tashkiloti uy qurilishini yakuniga yetkazmay ancha sarson qilgan. Qurilishi 2016-yil boshlangan uyimizga 2018-yil noyabr oyida ko‘chib o‘tganmiz.
Tuman hokimligi bosh mutaxassisi Ismatilla Mengliyevning ta’kidlashicha, ushbu namunali uy-joylar qurilishi oldidan aholiga ushbu hudud chekka hudud hisoblanishi, tabiiy gaz bo‘lmasligi, ichimlik suvi hovuz orqali ta’minlanishi ko‘zda tutilgani tushuntirilgan. Va shuning uchun ham har bir xonadonga 5 tonna sig‘imga ega hovuz qurilgan.
Ismatilla Mengliyevning ma’lumot berishicha, 2015-yil qurilgan 30 ta uyning 15 tasi “Usta tadbirkor” xususiy korxonasi tomonidan qurilgan bo‘lsa, qolgan 15 ta uy va yana 2016-yil qurilgan 7 ta uy-joylar “Tallimarjon maxsus inshoot qurilish-ta’mirlash” MChJ vakillari mehnati bilan qad rostlagan.
Aholi vakillarining shikoyatiga ko‘ra, qurilish loyihasida 2015-yil qurilgan 30 ta turar-joy majmuasi atrofidagi yo‘llar asfaltlanishi ko‘zda tutilgan bo‘lsa-da, yo‘l qurish shag‘al yotqizilishi bilan tugatib qo‘yilgan. Ish yakuniga yetmagan.
— Bu borada murojaat qilmagan joyimiz qolmadi, — deydi Shuhrat Mamarasulov. – Ammo haligacha ko‘chalarimiz asfaltlanmagan. Bundan-da yomoni shag‘al yotqizishda ishlar shu darajada chala va sifatsiz bajarilganki, shag‘al aholi xonadoniga kirish darvozalari tagida uyulib qolib, kirish imkoniyatini cheklab qo‘ygan.
Jurnalistik surishtiruvlarimiz davomida aniqlanishicha, 2016-yil qurib bitkazilgan 7 ta xonadonning ba’zilarida hatto qurilish ishlari ham yakuniga yetmay, tashlab ketilgan. Buni Buvaysha Arziqulova yashayotgan 32-xonadonning yuvinish xonalari ham isbotlab turibdi.
— Haqiqatdan ham 2016-yil “Tallimarjon maxsus inshoot qurilish-ta’mirlash” MChJ tomonidan qurilishi boshlangan 7 ta namunali turar-joy majmualari qurilishi o‘z vaqtida yakunlanmay, 2018-yilga kelib aholiga topshirilgan edi, — deydi Ismatilla Mengliyev. – Ancha muammoli holat yuzaga kelgandi. Bu esa aholi noroziligiga sabab bo‘ldi. Shu boisdan ham aholi murojaatiga ko‘ra, qurilish tashkiloti ustidan jinoiy ish ochilib, tegishli xulosalar qilingan.
Ushbu hududda yashovchi aholi vakillari suv va gaz muammosidan tashqari, hududda bolalar uchun bog‘cha, maktab va tibbiy punkt ham ko‘zda tutilmaganidan iztirobda.
— Hudud aholisi uchun bog‘cha, maktab va tibbiyot markazi qurilishi ko‘zda tutilgan edi, — deydi Ismatilla Mengliyev. – Ammo 6 sotix maydonga ega bu kabi turar-joy majmualari qurilishi yakunlangan, qolaversa ushbu hudud suv va gaz uchun ham noqulay joy hisoblangani bois, bog‘cha, maktab kabi ijtimoiy soha obyektlari qurilishi to‘xtab qolgan. Ammo yaqin kelajakda bog‘cha ham, maktab ham bo‘ladi, albatta. Sababi ushbu hududdan 400 nafar aholiga 4 sotixdan auksion orqali yer berish ko‘zda tutilgan bo‘lib, keyinchalik gavjum maskanga aylanishiga umid qilyapmiz.
Umid qilish yaxshi, albatta. Ammo bu kabi ishlar bitgunga qadar ushbu hududda yashayotgan 37 ta xonadon vakillari nima qiladi? Tuproqqa belanib, suvsiz, gazsiz yashashda davom etadimi? Demakki, ushbu hududdagi uy-joylar loyihasi tayyorlanayotgan payt suv va gaz kelishi amrimahol ekanligi aniq bo‘lgan bo‘lsa, unda xonadonga suv jo‘mraklari, yuvinish uchun “vanna” hamda gaz uchun “otopleniye” o‘rnatishdan maqsad nima? Savollar ko‘p. O‘ylaymizki, Nishon tuman hokimligi bu kabi savollarga tez orada jo‘yali javob qaytaradi.
Izoh (0)